ദുബായ്: കഴിഞ്ഞ വര്ഷത്തെ ഏറ്റവും മികച്ച ടി 20 പുരുഷ താരമായി ഭാരതത്തിന്റെ സൂര്യകുമാര് യാദവ് തിരഞ്ഞെടുക്കപ്പെട്ടു. തുടര്ച്ചയായ രണ്ടാം തവണയാണ് സൂര്യകുമാര് ഐസിസിയുടെ ഈ ബഹുമതി സ്വന്തമാക്കുന്നത്. കഴിഞ്ഞ വര്ഷം 17 ഇന്നിങ്സുകള് മാത്രം കളിച്ച സൂര്യ 48.86 ശരാശരിയിലും 155.95 സ്ട്രൈക്ക് റേറ്റിലും നാല് അര്ധസെഞ്ചുറികളും രണ്ട് സെഞ്ചുറികളുമടക്കം 733 റണ്സാണ് അടിച്ചെടുത്തത്. ഓള്റൗണ്ടര് ഹാര്ദിക് പാണ്ഡ്യയ്ക്ക് പരിക്കേറ്റതിനെ തുടര്ന്ന് സൂര്യകുമാറിന് ഭാരത ടി 20 ടീമിന്റെ ക്യാപ്റ്റന്സിയും നല്കിയിരുന്നു.
ജോഹന്നസ്ബര്ഗില് ദക്ഷിണാഫ്രിക്കയ്ക്കെതിരെ കഴിഞ്ഞ ഡിസംബറില് നടന്ന ഭാരതത്തിന്റെ അവസാന ടി20യില് 56 പന്തില് സൂര്യ സെഞ്ചുറി നേടിയിരുന്നു. ടി20യില് ഭാരതത്തിന്റെ രണ്ടാമത്തെ വേഗമേറിയ സെഞ്ച്വറിയും സൂര്യ സ്വന്തമാക്കി. ടി 20 ഫോര്മാറ്റില് ഏറ്റവും കൂടുതല് സെഞ്ചുറി നേടിയ താരങ്ങളില് രണ്ടാമതാണ് സൂര്യ. അഞ്ച് സെഞ്ചുറികള് നേടിയിട്ടുള്ള രോഹിത്താണ് ഒന്നാമന്. നാല് സെഞ്ചുറികള് നേടിയ സൂര്യ ഓസ്ട്രേലിയയുടെ ഗ്ലെന് മാക്സ്വെല്ലിനൊപ്പം രണ്ടാംസ്ഥാനം പങ്കിടുന്നു.
60 ടി 20 മത്സരങ്ങളില് നിന്ന് 45.55 ശരാശരിയിലും 171.55 സ്ട്രൈക്ക് റേറ്റിലും 2141 റണ്സാണ് സൂര്യയുടെ പേരിലുള്ളത്. കഴിഞ്ഞ ദിവസം പുറത്തിറങ്ങിയ ഐസിസി ടി20 ടീമിന്റെ ക്യാപ്റ്റനായും സൂര്യകുമാറിനെ തിരഞ്ഞെടുത്തിരുന്നു.
