കോയമ്പത്തൂര്‍: ഭര്‍ത്താവുമായി വഴക്കിനെ തുടര്‍ന്ന് അമ്മ ബസില്‍ ഉപേക്ഷിച്ച നാലുമാസം പ്രായമുളള കുഞ്ഞിനെ അന്വേഷിച്ച് അച്ഛനെത്തി. കോയമ്പത്തൂരിലാണ് സംഭവം. എന്നാല്‍ തൃശൂര്‍ സ്വദേശിയായ അച്ഛനും തമിഴ്‌നാട് സ്വദേശിനി അമ്മയും ഒരുമിച്ച് വന്നാലേ കുഞ്ഞിനെ കൈമാറാനാകൂ എന്നാണ് ശിശു സംരക്ഷണ വകുപ്പ് അറിയിച്ചത്.
വെള്ളിയാഴ്ചയാണ് തിരുച്ചിറപ്പള്ളി സ്വദേശിയായ യുവതി കുഞ്ഞിനെ ബസില്‍ ഉപേക്ഷിച്ചത്. ബസില്‍ കയറിയ യുവതി കുഞ്ഞിനെ മറ്റൊരാളെ ഏല്‍പിച്ച് മുങ്ങുകയായിരുന്നു. തുടര്‍ന്ന് പൊലീസെത്തി ആശുപത്രിയിലേക്കു മാറ്റിയ കുഞ്ഞ് ഇപ്പോള്‍ ശിശുസംരക്ഷണ വകുപ്പിന്റെ സംരക്ഷണയിലാണുളളത്.
സമൂഹമാധ്യമങ്ങളിലൂടെ വിവരമറിഞ്ഞാണ് കുഞ്ഞിന്റെ അച്ഛന്‍ പൊലീസ് സ്റ്റേഷനിലെത്തുന്നത്.
തമിഴ്‌നാട്ടില്‍ പഠിക്കവെ പ്രണയിച്ച് വിവാഹിതരായവരാണ് കുഞ്ഞിന്റെ അച്ഛനും അമ്മയും. എന്നാല്‍ വിവാഹത്തെ ബന്ധുക്കള്‍ എതിര്‍ത്തിരുന്നു.
വിവാഹശേഷം ഇവര്‍ കോയമ്പത്തൂരില്‍ താമസിക്കുകയായിരുന്നു. അടുത്തിടെയുണ്ടായ വഴക്കിനെത്തുടര്‍ന്ന് യുവാവ് തൃശൂരിലേക്കു മടങ്ങിയിരുന്നു.
പ്രതികരിക്കാൻ ഇവിടെ എഴുതുക: