ആലപ്പുഴ : ബിജെപി ഒബിസി മോര്‍ച്ച സംസ്ഥാന സെക്രട്ടറി അഡ്വ. രണ്‍ജിത്ത് ശ്രീനിവാസന്‍ വധക്കേസില്‍ പ്രതികളുടെ മാനസികനില പരിശോധിക്കാനായി ആശുപത്രിയില്‍ എത്തിച്ചു. ആലപ്പുഴ മെഡിക്കല്‍ കോളേജിലാണ് പരിശോധനയ്‌ക്കായി എത്തിച്ചത്. വിധി പ്രസ്താവന നടത്തുന്നതിന് മുമ്പ് പ്രതികളുടെ മാനസികനില പരിശോധിക്കുന്നത് പതിവാണ്.
വന്‍ പോലീസ് സന്നാഹത്തോടെയാണ് പ്രതികളെ മെഡിക്കല്‍ കോളേജ് ആശുപത്രിയില്‍ എത്തിച്ചത്. കോടതി നിര്‍ദ്ദേശപ്രകാരമാണ് നടപടി. 25ന് കേസ് വീണ്ടും പരിഗണിക്കും. അന്ന് പ്രതികള്‍ക്ക് പറയാനുള്ളത് കോടതി നേരിട്ട് കേട്ട ശേഷം ശിക്ഷവിധിയുടെ തീയതി തീരുമാനിക്കുക. പ്രതികള്‍ക്ക് എന്ത് ശിക്ഷ നല്‍കണമെന്ന കാര്യത്തില്‍ പ്രതിഭാഗത്തിന്റെ വാദമാണ് ഇപ്പോള്‍ നടക്കുന്നത്.
ശിക്ഷ സംബന്ധിച്ച് പ്രോസിക്യൂഷന്റ വാദം കഴിഞ്ഞ ദിവസം പൂര്‍ത്തിയായിരുന്നു. നിഷ്ഠൂരമായ കൊലപാതകമാണ് നടന്നത്. സാഹചര്യങ്ങള്‍ പരിഗണിച്ച് പ്രതികള്‍ക്ക് പരമാവധി ശിക്ഷ നല്‍കണമെന്നാണ് പ്രോസിക്യൂഷന്റ വാദം. അതേസമയം അപൂര്‍വങ്ങളില്‍ അപൂര്‍വമായ കേസായി ഇത് പരിഗണിക്കരുതെന്നും രഞ്ജിത്തിന്റേത് രാഷ്‌ട്രീയ കൊലപാതകമാണ്. പ്രതികള്‍ക്ക് വധശിക്ഷ നല്‍കരുതെന്നും പ്രതിഭാഗം കോടതിയില്‍ ആവശ്യപ്പെട്ടു.
ഷാനെ കൊന്നതിന്റെ സ്വഭാവിക പ്രതികരണം മാത്രമാണെന്നും അതുകൊണ്ട് ക്രിമിനല്‍ ഗൂഢാലോചന നിലനില്‍ക്കില്ലെന്നും പ്രതിഭാഗം അഭിഭാഷകന്‍ വാദിച്ചു. രാഷ്‌ട്രീയ കൊലപാതകങ്ങള്‍ കേരളത്തില്‍ സാധാരണയാണ്. പ്രതികളുടെ പ്രായം, കുടുംബം, പശ്ചാത്തലം എല്ലാം പരിഗണിച്ച് ശിക്ഷ ഇളവ് വേണമെന്നും പ്രതിഭാഗം അഭിഭാഷകന്‍ ആവശ്യപ്പെട്ടു. പ്രതികളെ ഓണ്‍ലൈനായിട്ടാണ് കഴിഞ്ഞ ദിവസം കോടതിയില്‍ ഹാജരാക്കിയത്. മാവേലിക്കര അഡീഷണല്‍ സെഷന്‍സ് ജഡ്ജി വി.ജി. ശ്രീദേവിയാണ് ശിക്ഷ പ്രഖ്യാപിക്കുന്നത്.
പ്രതികരിക്കാൻ ഇവിടെ എഴുതുക: