ചെന്നൈ : ദത്തുപുത്രി ആക്രമിച്ചെന്ന പരാതിയുമായി നടി ഷക്കീല. കോടാമ്പക്കത്തെ വീട്ടില്‍ വച്ചാണ് സംഭവമെന്ന് നടി പൊലീസില്‍ പരാതി നല്‍കി.
ശനിയാഴ്ചയാണ് ആക്രമണമുണ്ടായത്. ദത്തുപുത്രിയായ ശീതളുമായുള്ള വഴക്കിനിടെ തനിക്കും അഭിഭാഷകയായ സൗന്ദര്യയ്‌ക്കും പരിക്കേറ്റതായി ഷക്കീല പരാതിയില്‍ പറയുന്നു. ഷക്കീലയുടെ സഹോദരന്റെ മകളാണ് ശീതള്‍. സ്വന്തം കുട്ടിയെപ്പോലെയാണ് താരം വളര്‍ത്തിയത്.
റിപ്പോര്‍ട്ടുകള്‍ പ്രകാരം ഷക്കീലയുമായി രൂക്ഷമായ വഴക്കുണ്ടായതിനെ തുടര്‍ന്ന് ശീതള്‍ ആദ്യം വീട് വിട്ടിറങ്ങി. തുടര്‍ന്ന് ഷക്കീലയുടെ ആവശ്യപ്രകാരം പ്രശ്നം പരിഹരിക്കാന്‍ അഭിഭാഷക വീട്ടിലെത്തി. അപ്പോഴേക്കും സ്വന്തം അമ്മയ്‌ക്കും സഹോദരി ജമീലയ്‌ക്കും ഒപ്പം വീട്ടിലെത്തിയ ശീതള്‍ ഷക്കീലയെയും അഭിഭാഷകയെയും ആക്രമിച്ചു.
ശീതള്‍ ഷക്കീലയെ ട്രേ കൊണ്ട് അടിച്ചപ്പോള്‍ അമ്മ അഭിഭാഷക സൗന്ദര്യയുടെ കൈയില്‍ കടിച്ചു പരിക്കേല്‍പ്പിച്ചു. സംഭവത്തെ തുടര്‍ന്ന് ഷക്കീല പൊലീസില്‍ പരാതി നല്‍കി. പിന്നാലെ പൊലീസ് സ്റ്റേഷനില്‍ എത്തിയ ശീതള്‍ നടിക്കെതിരെയും പരാതി നല്‍കി. സിസിടിവി ദൃശ്യങ്ങള്‍ പരിശോധിച്ച് കൂടുതല്‍ അന്വേഷണം നടത്തിയ ശേഷം കേസ് രജിസ്റ്റര്‍ ചെയ്യുമെന്ന് പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക: