പാലക്കാട് : കാറിന്റെ രഹസ്യ അറയ്ക്കുള്ളില് കുഴല്പ്പണം ഒളിപ്പിച്ച് കടത്താനുള്ള ശ്രമത്തിനിടെ രണ്ട് പേര് പിടിയില്. പാലക്കാട് തെരച്ചിലിനിടെയാണ് കസബ പോലീസ് ഇവരെ പിടികൂടിയത്. മലപ്പുറം സ്വദേശികളായ മുഹമ്മദ് കുട്ടി, മുഹമ്മദ് നിസാര് എന്നിവരാണ് അറസ്റ്റിലായത്. ദേശീയപാതയില് പോലീസ് പരിശോധന നടത്തുന്നതിനിടെയാണ് ഇരുവരും പിടിയിലായത്
കാറിനുള്ളില് രഹസ്യ അറ പണിത് അതിനുള്ളില് ഒളിപ്പിച്ച നിലയിലായിരുന്നു പണം. 500 രൂപയുടെ നോട്ടുകള് ബണ്ടിലുകളാക്കി കോയമ്പത്തൂരില് നിന്നും സീറ്റിനടിയിലെ അറയില് അടുക്കിവെച്ച നിലയിലായിരുന്നു. ഈ പണം മലപ്പുറത്തെത്തിക്കാനുള്ള ശ്രമത്തിനിടെയിലാണ് പിടിയിലായത്. പോലീസ് വാഹനത്തിന് കൈകാണിച്ചതിനെ തുടര്ന്ന് ആദ്യം നിര്ത്താതെ പോയെങ്കിലും അവരെ പിന്തുടര്ന്ന് പിടികൂടുകയായിരുന്നു. കച്ചവടം കഴിഞ്ഞ് നാട്ടിലേക്ക് മടങ്ങുന്നവരാണെന്നാണ് ആദ്യം ഇവര് മൊഴി നല്കിയത്.
പ്രാഥമിക പരിശോധനയില് ഒന്നും കണ്ടെത്താനായില്ല. തുടര്ന്ന് വീണ്ടും പരിശോധന നടത്തിയതോടെയാണ് രഹസ്യ അറയില് നിന്നും നോട്ടുകെട്ടുകള് കണ്ടെത്തിയത്. പഴയ സ്വര്ണം വിറ്റ് കിട്ടിയ പണമാണെന്നായിരുന്നു പ്രതികളുടെ പിന്നീടുള്ള വാദം. എന്നാല് ഇരുവര്ക്കും രേഖകള് ഹാജരാക്കാനായില്ല. 2021 ല് ദേശീയപാതയില് കുഴല്പണ കടത്തുകാരെ ആക്രമിച്ച് പണം തട്ടുന്ന സംഘം നാലരക്കോടിയുമായി കടന്നിരുന്നു. പണം നഷ്ടപ്പെട്ട വാഹനം ഓടിച്ചിരുന്നത് ഇപ്പോള് പിടിയിലായ പ്രതികളിലൊരാളായ നിസാറായിരുന്നു.
ദേശീയപാതയില് വാളയാറിനും കുരുടിക്കാടിനും ഇടയില് നിരവധി തവണയാണ് കുഴല്പ്പണക്കടത്ത് സംഘം ആക്രമണത്തിന് ഇരയായിട്ടുള്ളത്. എന്നാല് ഇതെല്ലാം മറികടന്ന് നിരവധി തവണ പണം കേരളത്തിലേക്ക് കൊണ്ടുവന്നുവെന്നാണ് പ്രതികളുടെ മൊഴി. പണത്തിന്റെ ഉറവിടം സംബന്ധിച്ച് കൂടുതല് പരിശോധന നടത്തുമെന്ന് കസബ പോലീസ് അറിയിച്ചു.
