കൊച്ചി: എറണാകുളം മഹാരാജാസ് കോളേജില് എസ് എഫ് ഐ , കെ എസ് യു, ഫ്രറ്റേണിറ്റി സംഘടനകളിലെ വിദ്യാര്ത്ഥികള് തമ്മിലുണ്ടായ സംഘര്ത്തിന് പിന്നാലെ കോളേജ് അനിശ്ചിത കാലത്തേക്ക് അടച്ചു. കോളേജ് പ്രിന്സിപ്പാളിന്റെ നേതൃത്വത്തില് ചേര്ന്ന യോഗത്തിലാണ് കോളേജ് അടച്ചിടാന് തീരുമാനിച്ചത്.ഹോസ്റ്റലും അനിശ്ചിതകാലത്തേക്ക് അടച്ചു.
മഹാരാജാസ് കോളേജിലെ എസ്എഫ്ഐ യൂണിറ്റ് സെക്രട്ടറി നാസര് അബ്ദുള് റഹ്മാന് കുത്തേറ്റു. വിദ്യാര്ത്ഥിയെ സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്. എസ്എഫ്ഐ നേതാവിനെ കൊലപ്പെടുത്താന് ശ്രമിച്ചത് കെഎസ്യു, ഫ്രറ്റേണിറ്റി പ്രവര്ത്തകരാണെന്നാണ് ആരോപണം.
കെഎസ്യു, ഫ്രറ്റേണിറ്റി പ്രവര്ത്തകരായ 15 പേര്ക്കെതിരെ എറണാകുളം സെന്ട്രല് പൊലീസ് വധശ്രമം അടക്കം ഒന്പത് വകുപ്പുകള് ചുമത്തി കേസെടുത്തു. ഒരു വിദ്യാര്ത്ഥിനി അടക്കമാണ് പ്രതികള്. പ്രതികളും ആശുപത്രിയിലായതിനാല് ഡിസ്ചാര്ജ് ചെയ്താലുടന് ഇവരുടെ അറസ്റ്റ് രേഖപ്പെടുത്തുമെന്ന് പൊലീസ് അറിയിച്ചു.
പരിക്കേറ്റ ഫ്രറ്റേണിറ്റി വിദ്യാര്ത്ഥികളെ എസ് എഫ് ഐക്കാര് ആംബുലന്സില് കയറി മര്ദ്ദിക്കുന്ന ദൃശ്യങ്ങളും പുറത്തു വന്നിട്ടുണ്ട്.
കഴിഞ്ഞ രാത്രി 11.30ഓടെയായിരുന്നു സംഭവങ്ങളുടെ തുടക്കം. നാടകോത്സവത്തിന്റെ ചുമതലക്കാരനാണ് കുത്തേറ്റ നാസര് അബ്ദുള് റഹ്മാന്. രാത്രി 11.30ന് നാടക പരിശീലനം കഴിഞ്ഞ് ഇറങ്ങുമ്പോഴാണ് സംഘര്ഷമുണ്ടായതും കുത്തേറ്റതും.
അധ്യാപകനെ ആക്രമിച്ച ഫ്രറ്റേണിറ്റി പ്രവര്ത്തകനെതിരെ പ്രതിഷേധിച്ചതിലുള്ള വിരോധമാണ് കത്തിക്കുത്തിന് കാരണമെന്നാണ് എഫ്ഐആറിലുളളത്. 14 പേരടങ്ങുന്ന സംഘമാണ് നാസറിനെ ആക്രമിച്ചതെന്ന് കോളേജ് യൂണിയന് ചെയര്മാന് തമീം റഹ്മാന് പറഞ്ഞു.
