നിയന്ത്രണം വിട്ട കെഎസ്ആർടിസി ബസ് റോഡിൽ നിന്നും തെന്നിമാറി; വൻ ദുരന്തം ഒഴിവായത് തലനാരിഴയ്‌ക്ക്

ഇടുക്കി: പീരുമേട് കരടിക്കുഴി അയ്യപ്പ കോളേജിന് സമീപം നിയന്ത്രണം വിട്ട കെഎസ്ആർടിസി ബസ് റോഡിൽ നിന്നും തെന്നിമാറി അപകടം. കുമളിയിൽ നിന്നും കൊല്ലത്തേക്ക് പോകുകയായിരുന്ന ബസാണ് രാവിലെ അഞ്ച് മണിയോടെ അപകടത്തിൽപ്പെട്ടത്. വലിയ തിട്ടക്ക് മുകളിൽ വാഹനം തട്ടി നിന്നതിനാൽ താഴേക്ക് മറിയാഞ്ഞത് വലിയ ദുരന്തം ഒഴിവാക്കി.

കൊട്ടാരക്കര ഡണ്ടിഗൽ ദേശീയ പാതയിൽ പീരുമേട് കരടിക്കുഴിക്ക് സമീപം 56-ാം മൈൽ ഭാഗത്താണ് അപകടം നടന്നത്. കുമളി ഡിപ്പോയിൽ നിന്ന് കൊല്ലത്തേക്ക് പോകുകയായിരുന്ന കെഎസ്ആർടിസി ബസ് നിയന്ത്രണം വിട്ട് റോഡിൽ നിന്നും തെന്നിമാറി റോഡരികിലെ സംരക്ഷണ ഭിത്തിയിൽ തട്ടി നിൽക്കുകയായിരുന്നു. ഇതിന് താഴെ ഭാഗത്തായി സ്വകാര്യ കോളേജിലെ ഹോസ്റ്റൽ സ്ഥിതി ചെയ്യുന്നുണ്ട്.

ഇതിന്റെ മതിലിലാണ് ബസ് തങ്ങി നിന്നത്. അപകടം നടക്കുന്ന സമയത്ത് ഹോസ്റ്റലിൽ വിദ്യാർത്ഥികളുണ്ടായിരുന്നു. ബസിലെ യാത്രക്കാർക്ക് പരിക്കില്ല. അഗ്നിരക്ഷാ സേന, പോലീസ്, എംവിഡി എന്നിവർ സംഭവസ്ഥലത്തെത്തിയിട്ടുണ്ട്.