തിരുവനന്തപുരം: സ്കൂളുകളില് സമഗ്ര പാഠ്യ പദ്ധതി പരിഷ്കരണത്തിന്റെ ഭാഗമായി പുതിയ പുസ്തകങ്ങള്ക്ക് കരിക്കുലം സ്റ്റിയറിംഗ് കമ്മിറ്റി അംഗീകാരം നല്കിയെന്ന് വിദ്യാഭ്യാസ മന്ത്രി വി ശിവന്കുട്ടി.173 ടൈറ്റില് പാഠപുസ്തകങ്ങള്ക്കാണ് അംഗീകാരം നല്കിയത്.
ഒന്ന്, മൂന്ന്, അഞ്ച്, ഏഴ്, ഒന്പത് ക്ലാസുകളിലെ പാഠപുസ്തകങ്ങളാണ് അംഗീകരിച്ചത്. ഇതിന് മുന്പ് 2007 ലാണ് പാഠ്യപദ്ധതിയില് സമഗ്രമായ പരിഷ്കരണം കൊണ്ടുവന്നത്.
പുതിയ പാഠ്യപദ്ധതിയില് എല്ലാ പുസ്തകങ്ങളിലും മലയാളം അക്ഷരമാലയുണ്ട്. ജനാധിപത്യ മതേതര മൂല്യങ്ങള്ക്ക് യോജിക്കും വിധം നവകേരള സൃഷ്ടിക്ക് ഉതകുന്ന പാഠ്യ പദ്ധതികളാണ് കരിക്കുലത്തില് ഉള്ളതെന്ന് മന്ത്രി പറഞ്ഞു. ഒന്നര വര്ഷത്തെ പ്രവര്ത്തന ഫലമായിട്ടാണ് പാഠ്യ പദ്ധതി പരിഷ്ക്കരിച്ചത്.
മലയാളം , ഇംഗ്ലീഷ് , കന്നഡ ഭാഷകളില് പ്രസിദ്ധീകരിക്കുന്ന എല്ലാ പുതിയ പുസ്തകങ്ങളില് ഭരണഘടനയുടെ ആമുഖം ഉള്പ്പെടുത്തിയിട്ടുണ്ട്. അഞ്ച് മുതല് 10 വരെ ക്ലാസുകളിലെ കുട്ടികള്ക്ക് തൊഴില് പരിശീലനം നല്കും. അധ്യാപകര്ക്കും പുതിയ പാഠ്യപദ്ധതി സംബന്ധിച്ച് പരിശീലനം നല്കും.
ഖാദര് കമ്മിറ്റി റിപ്പോര്ട്ട് പ്രകാരം സ്പെഷ്യല് റൂള് കൊണ്ടുവരുമെന്നും ഇതിനായി കെഇആര് പരിഷ്കരിക്കുമെന്നും മന്ത്രി വ്യക്തമാക്കി. അടുത്ത അധ്യയന വര്ഷം സ്പെഷ്യല് റൂള് പ്രകാരമായിരിക്കും സ്കൂളുകള് പ്രവര്ത്തിക്കുക.
