ആലപ്പുഴ: വീട്ടിലിരുന്നുള്ള മദ്യപാനം എതിർത്ത അമ്മയെ കഴുത്ത് ഞെരിച്ച് കൊലപ്പെടുത്തിയ മകൻ അറസ്റ്റിൽ. തഴക്കര സ്വദേശി ലളിതയെയാണ് മകൻ ബിനീഷ് കൊലപ്പെടുത്തിയത്. പ്രമേഹത്തെ തുടർന്ന് ഇടത് കാൽ മുറിച്ചു മാറ്റിയ ലളിത കിടപ്പിലായിരുന്നു.
ബിനീഷ് തന്നെയാണ് മരണവിവരം പ്രദേശവാസികളെ അറിയിച്ചത്. തുടർന്ന് ജില്ലാ ആശുപത്രിയിൽ ലളിതയുടെ മൃതദേഹം എത്തിച്ചപ്പോൾ ഡോക്ടർമാർ സംശയം അറിയിച്ചു. ഇതോടെ നടത്തിയ ചോദ്യം ചെയ്യലിലാണ് കഴുത്തിൽ ഷാൾ മുറുക്കി കൊലപ്പെടുത്തുകയായിരുന്നുവെന്ന് പ്രതി സമ്മതിച്ചത്. വീട്ടിൽ ഇരുന്ന് മദ്യപിക്കുന്നത് എതിർത്തതിലുള്ള വിരോധമാണ് കൊലപാതകത്തിൽ കലാശിച്ചതെന്ന് പോലീസ് പറയുന്നു.
