കൊച്ചി: രാഷ്‌ട്രപിതാവ് സ്വപ്‌നം കണ്ട രീതിയിലുള്ള രാമരാജ്യത്തിന്റെ സൃഷ്ടിയാണ് രാമക്ഷേത്ര പ്രാണപ്രതിഷ്ഠയോടെ യാത്ഥാര്‍ഥ്യമാവുന്നതെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍.രാമക്ഷേത്രത്തിന്റെ പ്രാണപ്രതിഷ്ഠയോടനുബന്ധിച്ച് പ്രധാനമന്ത്രി നരേന്ദ്ര മോദിയുടെ ആഹ്വാനമനുസരിച്ച് ആരാധനാലയങ്ങളുടെയും തീര്‍ത്ഥാടന കേന്ദ്രങ്ങളുടെയും പരിസരം ശുചികരിക്കുന്ന സ്വച്ഛ തീര്‍ത്ഥപരിപാടിയുടെ ഉദ്ഘാടനം എറണാകുളം ശിവക്ഷേത്രപരിസരം വൃത്തിയാക്കി നിര്‍വഹിക്കുകയായിരുന്നു അദ്ദേഹം.
മഹാത്മജിയുടെ ഏറ്റവും വലിയ സ്വപ്‌നമായിരുന്നു സ്വച്ഛ ഭാരതം. മോദി സര്‍ക്കാരിന്റെ കീഴില്‍ രാജ്യം ആ ലക്ഷ്യം പൂര്‍ത്തീകരിക്കുകയാണെന്നും അദ്ദേഹം പറഞ്ഞു. ബിജെപി ജില്ലാ പ്രസിഡന്റ് കെ.എസ്. ഷൈജു അധ്യക്ഷനായി. സംസ്ഥാന വൈസ് പ്രസിഡന്റ് ഡോ. കെ.എസ്. രാധാകൃഷ്ണന്‍, ജില്ലാ പ്രഭാരി അഡ്വ. നാരായണന്‍ നമ്പൂതിരി, സഹ പ്രഭാരി വെള്ളിയാംകുളം പരമേശ്വരന്‍, ജില്ലാ ജനറല്‍ സെക്രട്ടറിമാരായ എസ്. സജി, വി.കെ. ഭസിത് കുമാര്‍, സംസ്ഥാന വ്യവസായ സെല്‍ കണ്‍വീനര്‍ എ. അനൂപ് കുമാര്‍, ഫിഷര്‍മെന്‍ സെല്‍ സംസ്ഥാന ജോ. കണ്‍വീനര്‍ സുനില്‍ തീരഭൂമി, ജില്ലാ വൈസ് പ്രസിഡന്റ് അഡ്വ. രമാദേവി തോട്ടുങ്കല്‍, കൗണ്‍സിലര്‍മാരായ പദ്മജ എസ് മേനോന്‍, അഡ്വ. പ്രിയ പ്രശാന്ത്, നേതാക്കളായ വേണുഗോപാല്‍, രാമലഹിതന്‍ എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: