ശബരിമല: മകരവിളക്ക് ഉത്സവത്തിന് ശബരിമലയില് ഒരുക്കങ്ങള് പൂര്ത്തിയായെന്ന് ദേവസ്വം ബോര്ഡ് പ്രസിഡന്റ് പി. എസ് പ്രശാന്ത്. മകര ജ്യോതി ദര്ശനത്തിനായി സജ്ജീകരിച്ചിട്ടുള്ള പത്ത് പോയിന്റുകളിലും എല്ലാ സൗകര്യങ്ങളും ഒരുക്കിയിട്ടുണ്ട്. മകര ജ്യോതി ദര്ശനത്തിനെത്തുന്ന ഭക്തര് പോലീസിന്റെയും അഗ്നിരക്ഷാസേനയുടെയും നിര്ദേശങ്ങള് അനുസരിക്കണമെന്നും ദേവസ്വം ബോര്ഡ് പ്രസിഡന്റ് അഭ്യര്ഥിച്ചു.
അന്നദാനത്തിന് പുറമേ ഇത്തവണ ആദ്യമായി ജനുവരി 14, 15 തിയതികളില് മൂന്ന് നേരവും ഭക്തര്ക്കായി പ്രത്യേക ഭക്ഷണസൗകര്യവും ഏര്പ്പെടുത്തിയിട്ടുണ്ട്. ഒരു ലക്ഷത്തോളം ഭക്തര്ക്ക് ഇത് പ്രയോജനപ്പെടും. തമിഴ്നാട് ദേവസ്വം ബോര്ഡില് നിന്നുള്ള 80 ലക്ഷത്തോളം ബിസ്കറ്റുകള് എത്തിച്ചിട്ടുണ്ട്. ഇതോടൊപ്പം ഇടതടവില്ലാതെ ചുക്കുവെള്ളവും ഭക്തര്ക്കായി നല്കുമെന്നും ദേവസ്വം ബോര്ഡ് പ്രസിഡന്റ് പറഞ്ഞു.
