തൃശൂര്: സുരേഷ് ഗോപിയുടെ മകളുടെ വിവാഹത്തില് പങ്കെടുക്കാന് പ്രധാനമന്ത്രി നരേന്ദ്രമോദി ഗുരുവായൂര് ക്ഷേത്രത്തിലെത്തുന്നത് കാരണം ഒരു വിവാഹം പോലും മാറ്റി വച്ചിട്ടില്ലെന്ന് ദേവസ്വം അഡ്മിനിസ്ട്രേറ്റര്. ബുക് ചെയ്ത എല്ലാ വിവാഹങ്ങളും നടത്തും.
സുരക്ഷ ഒരുക്കാന് വിവാഹങ്ങളുടെ സമയത്തില് മാറ്റം വരുത്തിയെന്നേയുളളൂ.വിവാഹം മാറ്റിവച്ചെന്ന രീതിയിലുള്ള വാര്ത്തകള് പ്രചരിച്ചതോടെയാണ് വിശദീകരണവുമായി ദേവസ്വം അഡ്മിനിസ്ട്രേറ്റര് രംഗത്തെത്തിയത്. വിവാഹ ദിവസമായ 17ന് രാവിലെ ചോറൂണിനും തുലാഭാരത്തിനും ക്ഷേത്രത്തില് വിലക്കുണ്ട്.
നരേന്ദ്രമോദിയെത്തുന്ന 17ാം തിയതി 48 വിവാഹങ്ങള്ക്ക് പുലര്ച്ചെ അഞ്ചിനും ആറിനും മധ്യേയാണ് സമയം അനുവദിച്ചിട്ടുളളത്. ആറ് മണിക്കും ഒന്പതിനും മധ്യേ വിവാഹങ്ങളില്ല. ഈ ദിവസം വിവാഹ സംഘങ്ങള് പ്രത്യേകം പാസെടുക്കണമെന്നും അധികൃതര് അറിയിച്ചു.
നിയന്ത്രണങ്ങള് പ്രകാരം വിവാഹ സംഘത്തില് 20 പേര്ക്ക് മാത്രമാണ് അനുമതി. ഫോട്ടോ, തിരിച്ചറിയല് കാര്ഡിന്റെ പകര്പ്പ് എന്നിവ നല്കി പൊലീസ് പാസെടുക്കണം.
