പന്തല്ലൂര് : പന്തല്ലൂരില് മൂന്നു വയസുകാരിയെ കടിച്ചുകൊന്ന പുലിയെ ഏറെ നേരത്തെ പരിശ്രമത്തിനൊടുവില് മയക്കുവെടിവെച്ച് കൂട്ടിലാക്കി. ഉച്ചയ്ക്ക് 1.55 ഓടെയാണ് മയക്കുവെടിവെച്ചത്. വൈകിട്ട് 3.30തോടെയാണ് പുലിയെ കൂട്ടിലാക്കി.
ജാര്ഖണ്ഡ് സ്വദേശികളുടെ മകളായ മൂന്ന് വയസ്സുകാരി നാന്സി ശനിയാഴ്ചയാണ് അതി ദാരുണമായി കൊല്ലപ്പെട്ടത്. വൈകിട്ട് അഞ്ച് മണിയോടെയാണ് അമ്മയ്ക്കൊപ്പം നടക്കുകയായിരുന്ന കുഞ്ഞിനെ തേയിലത്തോട്ടത്തില് പതിയിരിക്കുകയായിരുന്ന പുലി തട്ടിയെടുക്കുകയായിരുന്നു. കുട്ടിയുമായി ഏറെ ദൂരം ഓടിയ ശേഷം തേയിലത്തോട്ടത്തിലെ ഒരിടത്ത് ഉപേക്ഷിച്ച ശേഷം പുലി കടന്നുകളഞ്ഞു.
അമ്മയുടെ നിലവിളി കേട്ടെത്തിയ നാട്ടുകാരും തോട്ടം തൊഴിലാളികളും ഏറെ നേരം തിരഞ്ഞ ശേഷമാണ് കുട്ടിയെ കണ്ടെത്താനായത്. തുടര്ന്ന് പന്തല്ലൂര് സര്ക്കാര് ആശുപത്രിയിലെത്തിച്ചപ്പോഴേക്കും കുട്ടി മരിച്ചിരുന്നു. പുലിയുടെ ശല്യം അറിയിച്ചിട്ടും അധികൃതരുടെ ഭാഗത്തു നിന്നും നടപടിയുണ്ടാകാത്തതില് പ്രതിഷേധം ഉയര്ന്നിരുന്നു. കുട്ടിയുടെ സംഭവം കൂടിയായതോടെ നാട്ടുകാരും കൂട്ടിയുടെ മാതാപിതാക്കളും റോഡ് ഉപരോധിച്ച് പ്രതിഷേധിക്കുന്നതിനിടെയാണ് പുലിയെ പിടികൂടിയത്.
മൂന്നാഴ്ചയ്ക്കിടെ പന്തല്ലൂര് താലൂക്കില് അഞ്ചിടങ്ങളിലാണ് പുലിയുടെ ആക്രമണം ഉണ്ടായത്. ഡിസംബര് 21ന് പുലിയുടെ ആക്രമണത്തില് ഒരു സ്ത്രീ മരിച്ചിരുന്നു. ജനുവരി നാലിന് പുലിയുടെ ആക്രമണത്തില് വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന നാല് വയസ്സുകാരിക്ക് പരിക്കേല്ക്കുകയും ചെയ്തു. തുടര്ന്ന് വനം വകുപ്പ് വിവിധിയിടങ്ങളില് കൂട് വയ്ക്കുകയും, ക്യാമറ സ്ഥാപിച്ചതോടെയാണ് ആക്രമണം നടത്തിയത് പുലിയാണെന്ന് സ്ഥിരീകരിച്ചത്.
