തിരുവനന്തപുരം: ജസ്‌ന തിരോധാന കേസില്‍ ജനുവരി 19ന് ഹാജരാകാന്‍ കോട്ടയം സ്വദേശി ജസ്‌നയുടെ അച്ഛന് തിരുവനന്തപുരം ജില്ലാ ചീഫ് ജുഡീഷ്യല്‍ മജിസ്‌ട്രേറ്റ് കോടതി നോട്ടീസ് അയച്ചു. തുമ്പുണ്ടാക്കാന്‍ വഴിയില്ലെന്ന സിബിഐയുടെ റിപ്പോര്‍ട്ടില്‍ ആക്ഷേപമുണ്ടെങ്കില്‍ ബോധിപ്പിക്കണമെന്ന് സിജെഎം ഷിബു ഡാനിയേല്‍ നിര്‍ദേശിച്ചു.
കാഞ്ഞിരപ്പളളി കോളജിലെ ബിരുദ വിദ്യാര്‍ത്ഥിനിയായ ജസ്‌നയെ കണ്ടെത്താനായില്ല. ജസ്‌ന മരിച്ചതിനും മത പരിവര്‍ത്തനം നടത്തിയതിനും തെളിവില്ലെന്നും സിബിഐ കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു. ജസ്‌ന മതപരിവര്‍ത്തനം നടത്തിയിട്ടില്ല. കേരളത്തിലെയും പുറത്തെയും മതപരിവര്‍ത്തന കേന്ദ്രങ്ങള്‍ പരിശോധിച്ചു. ഇവിടെ നിന്ന് തെളിവുകള്‍ ലഭിച്ചില്ല. ജസ്‌ന കൊവിഡ് വാക്‌സിന്‍ സ്വീകരിച്ചിട്ടില്ല. തമിഴ്‌നാട്ടിലും കര്‍ണാടകയിലും മുംബൈയിലും അന്വേഷണം നടത്തി.
ഇന്റര്‍പോളിന്റെ സഹായം തേടിയെന്നും റിപ്പോര്‍ട്ടില്‍ പറയുന്നു. അതിനാല്‍ അന്വേഷണം അവസാനിപ്പിക്കാന്‍ അനുമതി തേടിയും കേസ് തെളിയിക്കപ്പെടേണ്ട കേസുകളുടെ പട്ടികയില്‍ ചേര്‍ക്കാന്‍ അനുവദിക്കണമെന്നുമാണ് സിബിഐ റിപ്പോര്‍ട്ടിലെ ആവശ്യം.
എല്ലാ സാധ്യതകളും പരിശോധിച്ചതായി സിബിഐ റിപ്പോര്‍ട്ടില്‍ വ്യക്തമാക്കിയിട്ടുണ്ട്. സിബിഐ തിരുവനന്തപുരം യൂണിറ്റിലെ ഇന്‍സ്പക്ടര്‍ നിപുണ്‍ ശങ്കറിന്റെ നേതൃത്വത്തിലുള്ള സംഘമാണ് കേസ് അന്വേഷിച്ചത്.
പ്രതികരിക്കാൻ ഇവിടെ എഴുതുക