ന്യൂദല്ഹി : കോഴ വാങ്ങിയെന്ന ആരോപണത്തില് പാര്ലമെന്റില് നിന്ന് പുറത്താക്കിയതില് മുന് തൃണമൂല് കോണ്ഗ്രസ് എംപി മഹുവ മൊയ്ത്രയുടെ ഹര്ജിയില് ലോക്സഭാ സെക്രട്ടറിയേറ്റിന്റെ അഭിപ്രായം സുപ്രീംകോടതി തേടി. മാര്ച്ച് 11 ലേക്ക് സുപ്രീംകോടതി ഹര്ജി മാറ്റി. ജസ്റ്റിസുമാരായ സഞ്ജീവ് ഖന്ന, എസ്.വി. ഭാട്ടി എന്നിവരടങ്ങുന്ന ബെഞ്ചാണ് ഹര്ജി പരിഗണിക്കുന്നത്.
ചോദ്യത്തിന് കോഴ ആരോപണത്തിലാണ് ലോക്സഭയില് നിന്നും മഹുവ അയോഗ്യയാക്കപ്പെട്ടിരുന്നു. എന്നാല് സംഭവത്തില് തെളിവില്ലെന്ന് ആരോപിച്ചാണ് മഹുവ സുപ്രീം കോടതിയെ സമീപിച്ചിരിക്കുന്നത്. കേസിലെ പരാതിക്കാരായ നിഷികാന്ത് ദുബൈ എംപിക്കോ, മുന് പങ്കാളി ആനന്ദ് ദെഹദ്രായിക്കോ തനിക്കെതിരെയുള്ള തെളിവ് എത്തിക്സ് കമ്മിറ്റിക്ക് മുന്നില് ഹാജരാക്കാന് കഴിഞ്ഞില്ല.
താന് പണം വാങ്ങിയെന്ന് ഹിരാനന്ദാനി ഗ്രൂപ്പ് സിഇഒ ദര്ശന് ഹിരാനന്ദാനി നല്കിയ സത്യവാങ് മൂലത്തിലും പറയുന്നില്ല. ഭൂരിപക്ഷം എംപിമാരും ചോദ്യങ്ങള് തയ്യാറാക്കാന് പാര്ലമെന്റ് പോര്ട്ടലിന്റെ ലോഗിന് വിവരങ്ങള് കൈമാറാറുണ്ട്. താനും അതേ ചെയ്തിട്ടുള്ളൂ. ഇത് തടയുന്നതിനായി നിയമങ്ങള് ഉണ്ടായിരുന്നില്ലെന്നും മഹുവ പറഞ്ഞു. ഇക്കാര്യങ്ങള് പറയാന് എത്തിക്സ് കമ്മിറ്റി അവസരം നല്കിയില്ലെന്നും, സ്വാഭാവിക നീതി നിഷേധിക്കപ്പെട്ടുവെന്നും മഹുവയുടെ ഹര്ജിയില് പറയുന്നുണ്ട്. മഹുവയുടെ ലോക്സഭാംഗത്വം റദ്ദാക്കാനുള്ള അധികാരം പാര്ലമെന്റിന്റെ ലോക്സഭക്കില്ലെന്നാണ് പ്രതിപക്ഷവും വിഷയത്തില് പറഞ്ഞത്.
അതേസമയം എംപിമാരുടെ രഹസ്യ വിവരങ്ങള് കൈമാറരുതെന്ന നിബന്ധന പാര്ലമെന്റിലുണ്ട്. എ്ന്നാല് മഹുവ അത് ലംഘിച്ചു. 2005ലെ കീഴ് വഴക്കമാണ് പാര്ലമെന്റ് പിന്തുടരുന്നതെന്നായിരുന്നു സ്പീക്കറുടെ നിലപാട്.
