മുംബൈ: ഭാരത പര്യടനത്തിനെത്തിയ ഓസ്‌ട്രേലിയന്‍ വനിതകള്‍ക്ക് ഏകദിന പരമ്പരയില്‍ സമ്പൂര്‍ണ വിജയം. മൂന്നാമത്തെയും അവസാനത്തെയും മത്സരത്തില്‍ ആശ്വാസ ജയത്തിനായിറങ്ങിയ ഭാരത വനിതകള്‍ നേരിട്ടത് വമ്പന്‍ തോല്‍വി.
190 റണ്‍സിന്റെ തോല്‍വിയാണ് ഓസ്‌ട്രേലിയ ഭാരതത്തിനെതിരെ മൂന്നാം മത്സരത്തില്‍ സ്വന്തമാക്കിയത്. പരമ്പരയിലെ ആദ്യ രണ്ട് മത്സരങ്ങളിലും ജയിച്ച സന്ദര്‍ശകര്‍ ഇന്നലത്തെവിജയത്തോടെ 3-0ന് ആധിപത്യം പുലര്‍ത്തി.
ഓസീസ് മുന്നില്‍ വച്ച 339 റണ്‍സ് പിന്തുടര്‍ന്ന ഭാരതം 148 റണ്‍സില്‍ തകര്‍ന്നു വീണു. ഭാരത നിരയില്‍ ആരും തന്നെ പൊരുതിപോലും നോക്കിയില്ല. അവസാന വിക്കറ്റ് വീഴുമ്പോള്‍ ഒരറ്റത്ത് ഓള്‍റൗണ്ടര്‍ ദീപ്തി ശര്‍മ(25) പുറത്താകാതെ നില്‍ക്കുന്നുണ്ടായിരുന്നു. മറ്റ് താരങ്ങളില്‍ സ്മൃതി മന്ദാനയും(29) ജെമീമ റോഡ്രിഗസും മാത്രമാണ് ഭേദപ്പെട്ട പ്രകടനം കാഴ്‌ച്ചവച്ചത്. രണ്ടാം ഏകദിനത്തിലെ സെഞ്ചുറി താരം റിച്ച ഘോഷ് 19 റണ്‍സെടുത്ത് പുറത്തായി. പൂജ വസ്ത്രാകറുടെ പോരാട്ടം 14 റണ്‍സില്‍ അവസാനിച്ചു.
ഓസ്‌ട്രേലിയന്‍ ബൗളര്‍മാര്‍ ഒന്നിനൊന്ന് മെച്ചമായപ്പോള്‍ പൊരുതി നോക്കുകപോലും ചെയ്യാതെ ഭാരത വനിതകള്‍ കീഴടങ്ങിക്കൊടുത്തു. നൂറ് റണ്‍സ് തികയും മുമ്പേ അഞ്ച് വിക്കറ്റുകള്‍ വീണതോടുകൂടി വിജയപ്രതീക്ഷ അകന്നു. തോല്‍വിയുടെ ആഴം എത്രത്തോളും വലുതായിരിക്കുമെന്ന് മാത്രമേ പിന്നീട് അറിയാനുണ്ടായിരുന്നുള്ളൂ. ഓസ്‌ട്രേലിയയ്‌ക്കായി ജോര്‍ജിയ വെയര്‍ഹാം മൂന്ന് വിക്കറ്റ് പ്രകടനത്തോടെ വിക്കറ്റ് വേട്ടയ്‌ക്ക് മുന്നില്‍ നിന്നു നയിച്ചു.
നേരത്തെ ടോസ് നേടി ആദ്യം ബാറ്റ് ചെയ്യാന്‍ തീരുമാനിച്ച ഓസ്‌ട്രേലിയയ്‌ക്കായി ഓപ്പണര്‍മാര്‍ പിടിമുറുക്കിയത് ഇന്നിങ്‌സിന് കരുത്തായി. ഫോബെ ലിച്ച്ഫീല്‍ഡ്(125 പന്തില്‍ 119) സെഞ്ചുറി നേടിയ മത്സരത്തില്‍ നായിക അല്ലീസ ഹീല(82) അര്‍ദ്ധ സെഞ്ചുറി പ്രകടനത്തോടെ പുറത്തായി. ഒന്നാം വിക്കറ്റില്‍ ഇരുവരും ചേര്‍ന്ന് 28.5 ഓവറില്‍ 189 റണ്‍സാണ് നേടിയത്. ഇത് നല്‍കിയ ആത്മവിശ്വാസത്തില്‍ നിശ്ചിത 50 ഓവറും പൂര്‍ത്തിയാക്കിയ സന്ദര്‍ശകര്‍ ഏഴ് വിക്കറ്റ് നഷ്ടത്തില്‍ 338 റണ്‍സെടുത്തു. ലിച്ച്ഫീല്‍ഡിന്റെ സെഞ്ചുറിക്ക് പുറമെ ആഷ്‌ലീ ഗാര്‍ഡ്‌നറും(30) അന്നാബെല്‍ സതര്‍ലാന്‍ഡും(23) മികച്ച പ്രകടനം കാഴ്‌ച്ചവച്ചു. വെയര്‍ഹാമും(11) അലാനാ കിങ്ങും(26) പുറത്താകാതെ നിന്നു. ഭാരത ബൗളര്‍മാരില്‍ ശ്രേയങ്ക പാട്ടീല്‍ മൂന്ന് വിക്കറ്റ് നേടി മുന്നിട്ടു നിന്നു.
പ്രതികരിക്കാൻ ഇവിടെ എഴുതുക: