കുട്ടിക്കര്‍ഷകരുടെ പശുക്കള്‍ കൂട്ടത്തോടെ ചത്ത സംഭവം; സഹായ ഹസ്തവുമായി മന്ത്രിമാരും സിനിമാ താരങ്ങളും

ഇടുക്കി : കുട്ടിക്കര്‍ഷകര്‍ വളര്‍ത്തിയ പശുക്കള്‍ കൂട്ടത്തോടെ ചത്തതില്‍ സഹായ ഹസ്തവുമായി മന്ത്രിമാരും സിനിമാ താരങ്ങളും. ഇടുക്കി ജില്ലയിലെ തൊടുപുഴ വെള്ളിയാമറ്റത്തെ കുട്ടി കര്‍ഷകരായ ജോര്‍ജു കുട്ടിയുടെയും മാത്യൂവിന്റെയും 13 പശുക്കളാണ് ചത്തത്. കപ്പത്തൊണ്ട് കഴിച്ചതിനെ തുടര്‍ന്നാണ് പശുക്കള്‍ ചത്തത്.

മികച്ച കുട്ടി ക്ഷീരകര്‍ഷകനുള്ള സംസ്ഥാന അവാര്‍ഡ് ലഭിച്ചത് കുട്ടിയാണ് മാത്യൂ. അവശേഷിക്കുന്നവയില്‍ 5 പശുക്കളുടെ നിലയും ഗുരുതരമാണ്. തൊടുപുഴയിലെ ഏറ്റവും മികച്ച ക്ഷീരഫാമുകളിലൊണിത്. 18ഉം 15ഉം വയസ്സുള്ള രണ്ട് കുട്ടികളാണ് ഈ ഫാം നടത്തുന്നത്. പശുക്കള്‍ കൂട്ടത്തോടെ ചത്തസംഭവം പുറത്തുവന്നതിന് പിന്നാലെ കുട്ടികള്‍ക്ക് സഹായ ഹസ്തവുമായി നടന്‍ ജയറാമാണ് ആദ്യം എത്തിയത്. ജയറാം ചൊവ്വാഴ്ച രാവിലെ തൊടുപുഴ വെള്ളിയാമറ്റത്തെ കുട്ടി കര്‍ഷകര്‍ഷകരുടെ വീട്ടിലെത്തി പണം കൈമാറുകയായിരുന്നു.

പുതിയ ചിത്രത്തിന്റെ ട്രെയിലര്‍ ലോഞ്ചിന് വേണ്ടി മാറ്റിവച്ച പണമാണ് ജയറാം കൈമാറിയത്. കുടുംബം അനുഭവിച്ച സമാന അവസ്ഥ തനിക്കും ഉണ്ടായിട്ടുണ്ടെന്നം, താന്‍ വളര്‍ത്തിയ പശുക്കള്‍ നേരെത്തെ സമാനമായ രീതിയില്‍ ചത്തിരുന്നു. നഷ്ടപ്പെടുന്ന വേദന വലുതാണ്. താനും ഭാര്യയും ഏറ്റവും കരഞ്ഞത് പശുക്കള്‍ ചത്തപ്പോഴാണെന്നും ജയറാം സഹായം കൈമാറിക്കൊണ്ട് പറഞ്ഞു. ഇത് കൂടാതെ കുട്ടികള്‍ക്കായി മമ്മൂട്ടി ഒരു ലക്ഷവും പൃഥ്വിരാജ് രണ്ട് ലക്ഷം രൂപയും നല്‍കുമെന്നും ജയറാം അറിയിച്ചു. രണ്ടുപേരും പ്രത്യേക ദൂതന്‍ വഴി ചൊവ്വാഴ വൈകിട്ട് തന്നെ പണം കൈമാറുമെന്നാണ് സൂചന.

ക്ഷീരവകുപ്പ് മന്ത്രി ചിഞ്ചുറാണി, ജലവകുപ്പ് മന്ത്രി റോഷി അഗസ്റ്റിന്‍ എന്നിവരും മാത്യൂവിന്റെ വീട്ടിലെത്തി. മാത്യൂവിന് ഇന്‍ഷുറന്‍സ് പരിരക്ഷയോടെ പശുക്കളെ കൈമാറുമെന്ന് മന്ത്രിമാര്‍ അറിയിച്ചു. പഞ്ചായത്തിന്റെ ഭാഗത്തു നിന്നും ഇവര്‍ക്ക് എല്ലാ ആനുകൂല്യങ്ങളും കൊടുക്കുമെന്നും മന്ത്രിമാര്‍ അറിയിച്ചു.

ഡിസംബര്‍ മുപ്പത്തിയൊന്ന് രാത്രിയും ഒന്നാം തീയതി പുലര്‍ച്ചെയുമായാണ് പശുക്കള്‍ കൂട്ടത്തോടെ ചത്തത്. ഞായറാഴ്ച വൈകുന്നേരം പുതുവത്സരവുമായി ബന്ധപ്പെട്ട് കുടുംബാംഗങ്ങള്‍ പുറത്തു പോയിരുന്നു. രാത്രി എട്ടോടെ തിരിച്ചു വന്നതിനു ശേഷം പശുക്കള്‍ക്ക് തീറ്റ കൊടുത്തു. ഇതില്‍ മരച്ചീനിയുടെ തൊലിയും ഉള്‍പ്പെട്ടിരുന്നു.

കുറച്ചു സമയം കഴിഞ്ഞതോടെ പശുക്കള്‍ ഒന്നൊന്നായി തളര്‍ന്നു വീഴുകയും പിന്നീട് ചാകുകയുമായിരുന്നു. സംഭവമറിഞ്ഞ നാട്ടുകാര്‍ ഓടിയെത്തി. ഇവര്‍ വിവരം അറിയിച്ചത് പ്രകാരം വെറ്റിനറി ഡോക്ടര്‍മാരായ ഗദ്ദാഫി, ക്ലിന്റ്, സാനി, ജോര്‍ജിന്‍ എന്നിവര്‍ സ്ഥലത്തെത്തി മരുന്ന് നല്‍കിയെങ്കിലും രക്ഷിക്കാനായില്ല.

പഠനത്തോടൊപ്പമാണ് മാത്യു പശുക്കളെ വളര്‍ത്തി കുടുംബത്തിന് കൈത്താങ്ങായിരുന്നത്.സംഭവത്തെ തുടര്‍ന്ന ദേഹാസ്വാസ്ഥ്യം അനുഭവപ്പെട്ട മാത്യുവിനെയും മാതാവിനെയും മൂലമറ്റത്തെ സ്വകാര്യാശുപത്രിയിലും പ്രവേശിപ്പിച്ചു.