പാലക്കാട് : കുതിരാന്‍ ദേശീയ പാതയില്‍ കാറും ലോറിയും കൂട്ടിയിടിച്ച് ഒരു മരണം. അഞ്ചു പേര്‍ക്ക് പരിക്ക്. തിരുവല്ല തോട്ടുപുഴശ്ശേരി പള്ളിയംപറമ്പില്‍ ചെറിയാന്‍(72) ആണ് മരിച്ചത്. ബെംഗളൂരുവില്‍ നിന്നും കോട്ടയത്തേക്ക് കുടുംബ സമേതം പോകുന്നതിനിടെ ഇവര്‍ സഞ്ചരിച്ച ഇന്നോവ കാര്‍ അപകടത്തില്‍പ്പെടുകയായിരുന്നു.’
പുലര്‍ച്ചെ മൂന്നോടെയാണ് കുതിരാന്‍ പാലത്തിനു മുകളില്‍ അപകടമുണ്ടാകുന്നത്. ലോറിയിലേക്ക് കാര്‍ ഇടിച്ചുകയറുകയായിരുന്നു. അപകടത്തില്‍ കാര്‍ പൂര്‍ണമായും തകര്‍ന്നു. രണ്ട് സ്ത്രീകളും നാല് പുരുഷന്മാരുമടക്കം ആറ് പേരായിരുന്നു കാറിലുണ്ടായിരുന്നത്. അപകടത്തില്‍പ്പെട്ട സ്ത്രീകളില്‍ ഒരാള്‍ ഗര്‍ഭിണിയാണ്.
മൂന്നു പേരെ തൃശൂരിലെ രണ്ട് സ്വകാര്യ ആശുപത്രികളിലായി പ്രവേശിപ്പിച്ചു. പരിക്കേറ്റ അഞ്ച് പേരുടെയും നില ഗുരുതരമാണ്. സ്വകാര്യ മെഡിക്കല്‍ കോളജില്‍ പ്രവേശിപ്പിച്ച ഒരു പുരുഷനാണ് മരിച്ചത്. ബന്ധുക്കളാരും എത്തിയിട്ടില്ല. ചെറിയാന്റെ മൃതദേഹം തൃശ്ശൂര്‍ ജൂബിലി മിഷന്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
കാര്‍ ഓടിച്ചിരുന്നയാള്‍ ഉറങ്ങിപ്പോയതാകാം അപകട കാരണമെന്നാണ് പ്രാഥമിക നിഗമനം. മുന്‍വശം പൂര്‍ണമായും തകര്‍ന്ന കാറില്‍ നിന്നും നാട്ടുകാരും പോലീസും ചേര്‍ന്ന് ഏറെ പാടുപെട്ടാണ് യാത്രക്കാരെ പുറത്തിറക്കിയത്.
പ്രതികരിക്കാൻ ഇവിടെ എഴുതുക: