തിരുവനന്തപുരം: സംസ്ഥാനത്ത് ഇന്ന് രാത്രി എട്ട് മുതൽ നാളെ രാവിലെ ആറ് വരെ സ്വകാര്യ പമ്പുകൾ തുറക്കില്ല. എന്നാൽ കെഎസ്ആർടിസി, സപ്ലൈകോ പമ്പുകൾ തുറക്കുമെന്ന് അധികാരികൾ അറിയിച്ചു. പമ്പ് ജീവനക്കാർക്ക് നേരെ ഉൾപ്പെടെയുള്ള ഗുണ്ടാ ആക്രമണങ്ങൾ കണക്കിലെടുത്താണ് പണിമുടക്കുന്നതെന്ന് ഓൾ കേരള ഫെഡറേഷൻ ഓഫ് പെട്രോളിയം ട്രേഡേഴ്സ് ഭാരവാഹികൾ വ്യക്തമാക്കി.
സർക്കാർ നടപടി സ്വീകരിക്കാത്ത പക്ഷം മാർച്ച് എട്ട് മുതൽ രാത്രി 10 വരെ മാത്രമാകും പമ്പുകൾ പ്രവർത്തിക്കുകയെന്നും സമിതി അറിയിച്ചു. പമ്പുകളുടെ സംരക്ഷണത്തിന് നിയമനിർമ്മാണം നടത്തണമെന്നാണ് സംഘടന മുന്നോട്ട് വയ്ക്കുന്ന ആവശ്യം. പ്ലാസ്റ്റിക് കുപ്പികളിൽ ഇന്ധനം നൽകരുതെന്നാണ് സർക്കാർ നിർദേശം. ഇത്തരത്തിൽ ഇന്ധനം നൽകിയാൽ ലൈസൻസ് റദ്ദാക്കുമെന്ന് കേന്ദ്ര ഏജൻസികളും നിർദേശിച്ചിട്ടുണ്ട്. എന്നാൽ രാത്രി കാലങ്ങളില്
കുപ്പികളിൽ ഇന്ധനം വാങ്ങാനെത്തുന്നവർ പ്രശ്നമുണ്ടാക്കുന്നത് പതിവാണെന്നും സംഘടന വ്യക്തമാക്കി.
ഡിസംബർ 31ന് സംസ്ഥാന വ്യാപകമായി സ്വകാര്യ പെട്രോൾ പമ്പുകൾ അടച്ച് സൂചനാ സമരം പ്രഖ്യാപിച്ചിരിക്കുന്ന സാഹചര്യത്തിൽ കെഎസ്ആർടിസിയുടെ ഉടമസ്ഥതയിലുള്ള 14 യാത്രാ ഫ്യൂവൽസ് ഔട്ട്ലെറ്റുകളും 24 മണിക്കൂറും പ്രവർത്തിക്കുമെന്ന് അധികൃതർ അറിയിച്ചു. തിരുവനന്തപുരം ഈസ്റ്റ് ഫോർട്ട്, വികാസ്ഭവൻ, കിളിമാനൂർ, ചടയമംഗലം, പൊൻകുന്നം, ചേർത്തല, മാവേലിക്കര, മൂന്നാർ, മൂവാറ്റുപുഴ, പറവൂർ, ചാലക്കുടി, തൃശൂർ, ഗുരുവായൂർ, കോഴിക്കോട് എന്നിവിടങ്ങളിലെ യാത്രാ ഫ്യൂവൽസ് ഔട്ലെറ്റുകളിൽ നിന്നും പൊതുജനങ്ങൾക്ക് ഇന്ധനം നിറയ്ക്കാമെന്നാണ് കെഎസ്ആർടിസി അറിയിച്ചിരിക്കുന്നത്.
