തിരുവനന്തപുരം: സിപിഎം നേതാവ് ടി എന്‍ സീമയുടെ ഭര്‍ത്താവ് ജി. ജയരാജിന് സി ഡിറ്റ് ഡയറക്ടര്‍ സ്ഥാനം വീണ്ടും നല്‍കാന്‍ സര്‍ക്കാര്‍ കൊണ്ടുവന്ന നോട്ടിഫിക്കേഷന്‍ ഹൈക്കോടതി റദ്ദാക്കി. രണ്ടാം പിണറായി സര്‍ക്കാരാണ് ഡയറക്ടര്‍ സ്ഥാനത്തേക്ക് നിയമനത്തിനുളള യോഗ്യതകള്‍ മാറ്റിയത്.
ഇത് ചോദ്യം ചെയ്ത് സിഡിറ്റ് ഡെപ്യൂട്ടി ഡയറക്ടറായ എം ആര്‍ മോഹനചന്ദ്രന്‍ സമര്‍പ്പിച്ച ഹര്‍ജിയിലാണ് സിംഗിള്‍ ബെഞ്ച് ഉത്തരവ്.
വിദ്യാഭ്യാസം, സയന്‍സ്, മാസ് കമ്യൂണിക്കേഷന്‍ മേഖലകളില്‍ മികവു കാട്ടിയവരെ നിയമിക്കാമെന്നായിരുന്നു മുന്‍ ശുപാര്‍ശ. ഇതില്‍ മാറ്റം വരുത്തി സര്‍വീസില്‍ നിന്ന് വിരമിച്ചവര്‍ക്കും നിയമനം നല്‍കാമെന്ന വ്യവസ്ഥയാണ് കൊണ്ടുവന്നത്. ജയരാജിന് വേണ്ടിയാണ് വ്യവസ്ഥകള്‍ മാറ്റിയതെന്നായിരുന്നു ആരോപണം. നോട്ടിഫിക്കേഷന്‍ റദ്ദാക്കിയതോടെയാണ് ജയരാജിന്റെ നിയമനവും അസാധുവായത്.
മുന്‍ നിയമനം കോടതിയിലെത്തിയതോടെ സര്‍ക്കാര്‍ നിയമനം റദ്ദാക്കിയിരുന്നു. പിന്നാലെ രണ്ടാം പിണറായി സര്‍ക്കാര്‍ യോഗ്യതകളില്‍ മാറ്റം വരുത്തി ജയരാജിനെ നിയമിച്ചു.
പ്രതികരിക്കാൻ ഇവിടെ എഴുതുക: