കാലടി: ധനുമാസ തിരുവാതിര നാളില് ഭക്തര്ക്ക് ദര്ശനപുണ്യം നല്കി തിരുവൈരാണിക്കുളം മഹാദേവ ക്ഷേത്രത്തില് ശ്രീപാര്വതിദേവിയുടെ നടതുറന്നു.
നടതുറപ്പുത്സവത്തിന് തുടക്കം കുറിച്ചുള്ള വര്ണാഭമായ തിരുവാഭരണ ഘോഷയാത്ര ഇന്നലെ വൈകിട്ട് നാലുമണിയോടെ അകവൂര് മനയില് നിന്നാണ് ആരംഭിച്ചത്. ശ്രീരാമസ്വാമി ക്ഷേത്രത്തിലെ പൂജകള്ക്ക് ശേഷം ഉമാമഹേശ്വരന്മാര്ക്ക് ചാര്ത്തുന്നതിനുള്ള തിരുവാഭരണങ്ങളും കെടാവിളക്കില് നിന്ന് പകര്ത്തിയ ദീപവും മനയിലെ കാരണവരില് നിന്ന് ക്ഷേത്ര ട്രസ്റ്റ് ഭാരവാഹികള് ഏറ്റുവാങ്ങി പ്രത്യേകം അലങ്കരിച്ച രഥത്തില് പ്രതിഷ്ഠിച്ചു. ഘോഷയാത്രയില് നൂറുകണക്കിന് ബാലികമാരും യുവതികളും പൂത്താലങ്ങളേന്തി അണിനിരന്നു. മൂന്നര മണിക്കൂര് പിന്നിട്ട് ഘോഷയാത്ര രാത്രി ഏഴരയോടെ ക്ഷേത്രത്തില് എത്തിയപ്പോള് മേല്ശാന്തി നടുവം നാരായണന് നമ്പൂതിരി തിരുവാഭരണങ്ങള് ഏറ്റുവാങ്ങി വിഗ്രഹങ്ങളില് അണിയിച്ചു. പിന്നീട് ഊരാണ്മക്കാരായ അകവൂര്, വെടിയൂര്, വെണ്മണി മനകളിലെ പ്രതിനിധികളും സമുദായ തിരുമേനിയും ദേവിയുടെ ഉറ്റതോഴി സങ്കല്പമായ പുഷ്പിണിയും ക്ഷേത്ര ട്രസ്റ്റ് ഭാരവാഹികളും തിരുനടയ്ക്കു മുന്നിലെത്തിയതോടെ നട തുറപ്പ് ചടങ്ങുകള് ആരംഭിച്ചു.
ചടങ്ങുകള് പൂര്ത്തിയാക്കി സമുദായ തിരുമേനിയുടെ നിര്ദേശപ്രകാരം ബ്രാഹ്മണിയമ്മ നടതുറക്കാന് പറഞ്ഞതോടെ മേല്ശാന്തി ശ്രീപാര്വതീ ദേവിയുടെ നട തുറന്നു. ഒരു വര്ഷം നീണ്ട കാത്തിരിപ്പിന്റെ സാഫല്യത്തിനായി ആയിരക്കണക്കിന് ഭക്തജനങ്ങളാണ് ചടങ്ങുകള് ദര്ശിക്കാനെത്തിയത്. രാത്രിയില് ദേവിയെ സ്തുതിച്ച് തിരുവാതിര കളിയും പൂത്തിരുവാതിര ചടങ്ങുകളും പാതിരാപൂ ചൂടലും നടന്നു.
ഇനിയുള്ള 11 ദിനങ്ങള് ഉമാമഹേശ്വര അനുഗ്രഹത്താല് ക്ഷേത്രസന്നിധി ഭക്തിസാന്ദ്രമാകും. നടതുറപ്പ് വേളയില് രാവിലെ 4 മുതല് ഉച്ചക്ക് 1.30 വരേയും 2 മുതല് രാത്രി 9 വരെയുമാണ് ദര്ശനം.
