പത്തനാപുരം: പുതുവര്ഷത്തില് ഗാന്ധിഭവന് മറ്റൊരു വലിയ സമ്മാനവുമായി ലുലു ഗ്രൂപ്പ് ചെയര്മാന് എം.എ. യൂസഫലി. ആയിരത്തിമുന്നൂറോളം അഗതികള്ക്ക് അഭയകേന്ദ്രമായ പത്തനാപുരം ഗാന്ധിഭവനിലെ പുരുഷവയോജനങ്ങള്ക്കായി പ്രമുഖ വ്യവസായി എം.എ. യൂസഫലി നിര്മിച്ചുനല്കുന്ന ബഹുനില മന്ദിരത്തിന് ക്രിസ്മസ് ദിനത്തില് ശിലയിട്ടു.
ഗാന്ധിഭവന് സ്ഥാപകനും സെക്രട്ടറിയുമായ പുനലൂര് സോമരാജന്റെയും അന്തേവാസികളായ ചലച്ചിത്ര നടന് ടി.പി. മാധവനടക്കം മുതിര്ന്ന പൗരന്മാരുടെയും സാന്നിധ്യത്തില് നടന്ന ലളിതമായ ചടങ്ങില് എം.എ. യൂസഫലിയാണ് ശിലാസ്ഥാപനം നിര്വ്വഹിച്ചത്. ഗാന്ധിഭവനിലെ മുന്നൂറിലധികം അമ്മമാര്ക്ക് താമസിക്കുവാന് പതിനഞ്ചു കോടിയിലധികം തുക മുടക്കി യൂസഫലി നിര്മിച്ചുനല്കിയ ബഹുനില മന്ദിരത്തിനു സമീപത്തായാണ് പുതിയ കെട്ടിടം ഉയരുന്നത്. മുന്നൂറോളം അന്തേവാസികള്ക്ക് അത്യന്താധുനിക സൗകര്യങ്ങളോടെ താമസിക്കുവാനുള്ള സംവിധാനങ്ങളൊരുക്കുന്ന കെട്ടിടം പൂര്ത്തിയാകുമ്പോള് ഇരുപത് കോടിയോളം ചെലവ് വരുമെന്നാണ് പ്രതീക്ഷ.
മൂന്ന് നിലകളായാണ് നിര്മ്മാണം. അതിനും മുകളിലായി 700 പേര്ക്ക് ഇരിക്കാവുന്ന പ്രാര്ത്ഥനാഹാളുമുണ്ടാകും. അടിയന്തിര ശുശ്രൂഷാസംവിധാനങ്ങള്, പ്രത്യേക പരിചരണവിഭാഗങ്ങള്, ഫാര്മസി, ലബോറട്ടറി, ലൈബ്രറി, ഡൈനിങ് ഹാള്, ലിഫ്റ്റുകള്, മൂന്ന് മതസ്ഥര്ക്കുമായി പ്രത്യേകം പ്രാര്ത്ഥനാമുറികള്, ഡോക്ടര്മാരുടെ പരിശോധനാ മുറികള്, ആധുനിക ശുചിമുറി ബ്ലോക്കുകള്, മാലിന്യസംസ്കരണ സംവിധാനങ്ങള്, ഓഫീസ് സംവിധാനങ്ങള്, കിടക്കകള്, ഫര്ണീച്ചറുകള് എന്നിവയെല്ലാമടങ്ങുന്ന കെട്ടിടത്തിന്റെ നിര്മാണം രണ്ട് വര്ഷത്തിനുള്ളില് പൂര്ത്തിയാക്കി അച്ഛന്മാര്ക്കായി സമ്മാനിക്കുമെന്ന് യൂസഫലി പറഞ്ഞു.
ഗാന്ധിഭവനിലെത്തിയ യൂസഫലിയെ കുട്ടികള് ബാന്ഡ് മേളത്തോടെയും അമ്മമാര് പുഷ്പങ്ങള് നല്കിയുമാണ് സ്വീകരിച്ചത്. അദ്ദേഹം കേക്ക് മുറിച്ച് അമ്മമാര്ക്ക് നല്കി ക്രിസ്മസ് സന്തോഷം പങ്കിട്ടു. തുടര്ന്ന് ശിലാസ്ഥാപനത്തിന് ശേഷം ഗാന്ധിഭവനിലെ കിടപ്പുരോഗികളടക്കമുള്ള അന്തേവാസികളെ സന്ദര്ശിച്ചു.
2016 ആഗസ്റ്റിലാണ് യൂസഫലി ആദ്യമായി ഗാന്ധിഭവന് സന്ദര്ശിക്കുന്നത്. അന്ന് ഗാന്ധിഭവനിലെ സ്ഥലപരിമിതി ബോധ്യപ്പെട്ടു. ജീവിതത്തില് ഒറ്റപ്പെട്ടുപോകുന്നവര് ജീവിത സായന്തനത്തില് എല്ലാ സുഖസൗകര്യങ്ങളും അനുഭവിച്ച് കഴിയണം എന്നുള്ള ചിന്തയിലാണ് ഗാന്ധിഭവനില് ഇത്തരം സഹായങ്ങള് ചെയ്യുന്നതെന്നും അദ്ദേഹം പറഞ്ഞു.
ശിലാസ്ഥാപന ചടങ്ങില് യുസഫലിക്കൊപ്പം ലുലു ഗ്രൂപ്പ് ഇന്റനാഷണല് കമ്മ്യൂണിക്കേഷന് മാനേജര് വി. നന്ദകുമാര്, ചീഫ് എഞ്ചിനീയര് ബാബു വര്ഗ്ഗീസ്, മീഡിയ ഹെഡ് ബിജു കൊട്ടാരത്തില്, യൂസഫലിയുടെ സെക്രട്ടറി ഇ.എ. ഹാരിസ്, തിരുവനന്തപുരം റീജിയണല് ഡയറക്ടര് ജോയ് ഷഡാനന്ദന്, മീഡിയ കോ-ഓര്ഡിനേറ്റര് എന്.ബി. സ്വരാജ്, ഗാന്ധിഭവന് വൈസ് ചെയര്മാന് പി.എസ്. അമല്രാജ് എന്നിവരും പങ്കെടുത്തു.
പല ഘട്ടങ്ങളിലായി എട്ടു കോടിയിലധികം രൂപയുടെ സഹായങ്ങളും യൂസഫലി ഗാന്ധിഭവന് നല്കിയിട്ടുണ്ട്. ഗാന്ധിഭവനിലെയും കേരളത്തിലുടനീളമുള്ള ഇരുപത് ശാഖകളിലെയും അന്തേവാസികള്ക്ക് അന്നദാനത്തിനു പുറമെ, പുതിയ മന്ദിരത്തോട് ചേര്ന്ന് ഏഴ് ഏക്കറിലധികം വസ്തു വാങ്ങാനാണ് ഈ തുകയത്രയും ചെലവിട്ടതെന്ന് ഗാന്ധിഭവന് സെക്രട്ടറി പുനലൂര് സോമരാജന് പറഞ്ഞു. കുഞ്ഞുങ്ങള് മുതല് വയോധികര് വരെ-രോഗികള്, മാനസികരോഗികള്, ശാരീരിക വൈകല്യങ്ങളുള്ളവര്, കിടപ്പുരോഗികള്, എച്ച്.ഐ.വി. ബാധിതര് എന്നിങ്ങനെ അന്യസംസ്ഥാനക്കാരടക്കം ആയിരത്തിമുന്നൂറിലധികം പേര് അധിവസിക്കുന്ന ഗാന്ധിഭവനിലെ സ്ഥലപരിമിതിക്ക് ഇതോടെ ആശ്വാസമാകുമെന്നും സെക്രട്ടറി പറഞ്ഞു.
