തിരുവനന്തപുരത്ത് ഡ്രെയിനേജിന് കുഴിയെടുക്കുന്നതിനിടെ അപകടം: രണ്ട് തൊഴിലാളികള്‍ മണ്ണിനടിയില്‍പ്പെട്ടു

തിരുവനന്തപുരം: തിരുവനന്തപുരം ശ്രീകാര്യത്ത് നിര്‍മാണ പ്രവര്‍ത്തനങ്ങള്‍ക്കിടെ മണ്ണിടിഞ്ഞ് വീണ് രണ്ട് ഇതര സംസ്ഥാന തൊഴിലാളികള്‍ മണ്ണിനടിയില്‍പെട്ടു. ഡ്രെയിനേജിനായി കുഴിയെടുക്കുന്നതിനിടെയാണ് അപകടം ഉണ്ടായത്. 10 അടി താഴ്ചയിലേക്ക് മണ്ണിടിഞ്ഞ് വീഴുകയായിരുന്നു.

അപകടത്തില്‍പെട്ട ഒരാളെ പുറത്തെടുത്തു. ഇയാളുടെ ആരോഗ്യനില ഗുരുതരാവസ്ഥയിലാണെന്ന് പോലീസ് അറിയിച്ചു. ഒരാള്‍ ഇപ്പോഴും മണ്ണിനിടയില്‍ കുടുങ്ങിക്കിടക്കുകയാണ്. ബീഹാര്‍ സ്വദേശി ദീപക്കാണ് മണ്ണിനടിയില്‍ ഇപ്പോഴും കുടുങ്ങി കിടക്കുന്നത്. ഫയര്‍ഫോഴ്‌സും നാട്ടുകാരും ചേര്‍ന്ന് ഇയാളെ രക്ഷപ്പെട്ടുത്താനുള്ള ശ്രമങ്ങള്‍ നടക്കുകയാണ്.