ജോഹന്നാസ്ബര്‍ഗ്: ദക്ഷിണാഫ്രിക്കയ്‌ക്കെതിരായ ടെസ്റ്റ് ടീമില്‍ നിന്നും പിന്‍മാറിയ ഭാരത താരം ഋതുരാജ് ഗെയ്‌ക്ക്‌വാദിന് പകരം അഭിമന്യു ഈശ്വരനെ ഉള്‍പ്പെടുത്തി. വിരലിന് പരിക്കേറ്റത് കാരണം ഋതുരാജ് ഗെയ്‌ക്ക്‌വാദിനെ ബിസിസിഐ പിന്‍വലിച്ചിരുന്നു.
ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ രണ്ടാം മത്സരത്തില്‍ ഫീല്‍ഡിങ്ങിനിടെയാണ് ഋതുരാജിന്റെ കൈവിരലിന് പരിക്കേറ്റത്. ഭാരത ക്രിക്കറ്റ് ടീമിനൊപ്പമുള്ള മെഡിക്കല്‍ സംഘം നടത്തിയ പരിശോധനയില്‍ പരിക്ക് അതീവ ഗുരുതരമുള്ളതാണെന്ന് കണ്ടെത്തി. ഇതില്‍ നിന്നും മുക്തി നേടാന്‍ സമയമെടുക്കുമെന്നും മെഡിക്കല്‍ സംഘം വിലയിരുത്തി. ഇതിന്റെ അടിസ്ഥാനത്തിലാണ് താരത്തെ ടെസ്റ്റ് ടീമില്‍ നിന്നും ഒഴിവാക്കിയത്. ഏകദിന പരമ്പരയിലെ അവസാന മത്സരത്തില്‍ ഋതുരാജ് കളിച്ചിരുന്നില്ല.
നിലവില്‍ ദക്ഷിണാഫ്രിക്കയിലേക്ക് പുറപ്പെട്ടിട്ടുള്ള ഭാരത എ ടീം നായകനാണ് അഭിമന്യു ഈശ്വരന്‍. അവിടെ നിന്നാണ് താരത്തിന് സീനിയര്‍ ടീമിലേക്ക് ഉയര്‍ത്തിയിരിക്കുന്നത്. ഏകദിന പരമ്പരയില്‍ കളിച്ച യുവതാരങ്ങള്‍ പലരും ഏകദിന പരമ്പരയില്‍ കളിച്ചവരാണ്.
ചൊവ്വാഴ്‌ച്ചയാണ് ദക്ഷിണാഫ്രിക്കയ്‌ക്കെതിരായ ഭാരതത്തിന്റെ ആദ്യ ടെസ്റ്റ് മത്സരം. രണ്ട് മത്സര പരമ്പരയിലെ അവസാന ടെസ്റ്റ് ജനുവരിയിലാണ്.
