തേഞ്ഞിപ്പാലം: എസ്എഫ്‌ഐയുടെ കനത്ത പ്രതിഷേധങ്ങള്‍ക്കിടെ കാലിക്കറ്റ് സര്‍വകലാശാലയില്‍ ഗവര്‍ണര്‍ ഉദ്ഘാടകനായ സെമിനാറില്‍ വൈസ് ചാന്‍സലര്‍ പങ്കെടുക്കാത്തതിൽ വിശദീകരണം തേടി രാജ് ഭവൻ. വൈസ് ചാൻസിലർ എം.കെ ജയരാജ് നടത്തിയത് കീഴ്വഴക്ക ലംഘനമാണെന്നാണ് ഗവർണർ ആരിഫ് മുഹമ്മദ്ഖാന്റെ നിരീക്ഷണം.
ആരോഗ്യപ്രശ്നത്തെ തുടർന്നാണ് പരിപാടിക്ക് എത്താതിരുന്നതിങ്കിൽ പകരക്കാരനായി പ്രോ വൈസ് ചാൻസിലറെ എന്ത് കൊണ്ട് അയച്ചില്ലെന്നും രാജ്ഭവൻ ചോദിക്കുന്നു. യൂണിവേഴ്‌സിറ്റി സനാതന ധര്‍മപീഠം ചെയറും ഭാരതീയ വിചാരകേന്ദ്രവും ചേര്‍ന്നു നടത്തിയ സെമിനാറില്‍ അദ്ധ്യക്ഷനാകേണ്ടിയിരുന്നത് വൈസ് ചാന്‍സലര്‍ എം.കെ. ജയരാജായിരുന്നു. വിസിയുടെ അഭാവത്തില്‍ സ്വാമി ചിദാനന്ദപുരിയാണ് അദ്ധ്യക്ഷത വഹിച്ചത്. ഗവര്‍ണറുള്ള പരിപാടിയില്‍ വിസിക്ക് വരാന്‍ സാധിക്കില്ലെങ്കില്‍ പ്രോ വൈസ് ചാന്‍സലറേ അയക്കണമെന്നതാണ് കീഴ്‌വഴക്കമെന്നും എന്നാല്‍ അത് ലംഘിക്കപ്പെട്ടുവെന്നും പരിപാടിക്ക് അദ്ധ്യക്ഷത വഹിച്ച സ്വാമി ചിദാനന്ദപുരി പറഞ്ഞു.
വിസിയുടെ നടപടി ചട്ടലംഘനമാണെന്നും നടപടി ഉണ്ടായേക്കുമെന്നും സൂചനകളുണ്ട്. ഇന്നലെ വൈകിട്ട് നാല് മണിയോടെ ആരംഭിച്ച ചടങ്ങ് സെമിനാര്‍ ഹാളില്‍ നടക്കുമ്പോള്‍ കാസസിന് പുറത്ത് പ്രതിഷേധവുമായി എസ്എഫ്ഐ പ്രവര്‍ത്തകരും നിലയുറപ്പിച്ചിരുന്നു. സെമിനാര്‍ തുടങ്ങുന്നതിന് തൊട്ടുമുമ്പും പരീക്ഷാ കേന്ദ്രത്തിലേക്ക് എസ്എഫ്ഐ പ്രവര്‍ത്തകര്‍ വലിയ പ്രതിഷേധം സംഘടിപ്പിച്ചു. പ്രവര്‍ത്തകരെ ഗവര്‍ണര്‍ താമസിക്കുന്ന ഗസ്റ്റ് ഹൗസിന് സമീപം പോലീസ് തടഞ്ഞു. എസ്എഫ്ഐ സംസ്ഥാന സെക്രട്ടറി പി.എം. ആര്‍ഷോം അടക്കമുള്ള പ്രവര്‍ത്തകരെ പോലീസ് അറസ്റ്റ് ചെയ്ത് നീക്കുകയായിരുന്നു.
എസ്എഫ്ഐ ഗുണ്ടകളുടെ സംഘടനയാണെന്ന് സെമിനാറില്‍ പങ്കെടുക്കാന്‍ വേദിയില്‍ കയറുന്നതിന് തൊട്ടു മുമ്പ് ഗവര്‍ണര്‍ ആരിഫ് മുഹമ്മദ് ഖാന്‍ മാധ്യമങ്ങളോട് പ്രതികരിച്ചു. സര്‍വകലാശാലയില്‍ പ്രതിഷേധിക്കുന്ന എസ്എഫ്ഐ പ്രവര്‍ത്തകരെ പോലീസ് സുരക്ഷയില്‍ മുഖ്യമന്ത്രിയാണ് അയക്കുന്നതെന്ന് ഗവര്‍ണര്‍ ആവര്‍ത്തിച്ചു. സെമിനാര്‍ അവസാനിച്ച ശേഷം ഗവര്‍ണര്‍ രാത്രി എട്ടോടെ തിരുവനന്തപുരത്തേക്കു മടങ്ങുകയും ചെയ്തിരുന്നു.
ഗവർണർക്കെതിരെ എസ് എഫ് ഐ പോസ്റ്റർ ഉയർത്തിയ സംഭവത്തിലും നേരത്തെ വിസിയോടെ വിശദീകരണം തേടിയിരുന്നു. എന്നാൽ ഇതുവരെ ഇതിന് വിസി മറുപടി നൽകിയിരുന്നില്ല.
പ്രതികരിക്കാൻ ഇവിടെ എഴുതുക: