കനത്ത മഴ: മുല്ലപ്പെരിയാര്‍ അണക്കെട്ട് ഇന്ന് തുറക്കും

കുമളി: വനത്തിനുള്ളില്‍ തുടരുന്ന കനത്ത മഴയെ തുടര്‍ന്ന് ജലനിരപ്പ് ഉയര്‍ന്നതോടെ മുല്ലപ്പെരിയാര്‍ അണക്കെട്ട് ഇന്ന് രാവിലെ പത്തിന് തുറക്കും.

ജലനിരപ്പ് ഇന്നലെ വൈകിട്ട് 138 അടി പിന്നിട്ടതോടെ രണ്ടാം ഘട്ട മുന്നറിയിപ്പ് നല്‍കി. അണക്കെട്ടിന്റെ സ്പില്‍ വേ ഷട്ടറുകള്‍ തുറന്നാകും വെള്ളം പെരിയാറിലേക്ക് ഒഴുക്കുക. സെക്കന്‍ഡില്‍ പരമാവധി പതിനായിരം ഘനയടി വെള്ളം വരെ തുറന്നുവിടുമെന്നാണ് തമിഴ്‌നാട് പൊതുമരാമത്ത് വകുപ്പ് അറിയിച്ചിരിക്കുന്നത്.

ഇതേത്തുടര്‍ന്ന് പെരിയാര്‍ തീരത്തുള്ളവര്‍ക്ക് ജില്ലാ ഭരണകൂടം ജാഗ്രത നിര്‍ദേശം നല്‍കി. അതേസമയം പെരിയാറില്‍ വെളളം കുറവായതിനാല്‍ ആശങ്കപ്പെടേണ്ട സാഹചര്യമില്ല. വള്ളക്കടവ്, വണ്ടിപ്പെരിയാര്‍, ചപ്പാത്ത്, ആലടി, ഉപ്പുതറ, അയ്യപ്പന്‍കോവില്‍ വഴി ഇടുക്കി സംഭരണിയിലേക്ക് ആറ് മണിക്കൂര്‍ കൊണ്ട് വെള്ളമെത്തും.

138.20 അടിയാണ് മുല്ലപ്പെരിയാറിലെ ജലനിരപ്പ്. സെക്കന്‍ഡില്‍ 11060.79 ഘനയടി വെള്ളം ഡാമിലേക്ക് ഒഴുകിയെത്തുമ്പോള്‍ 1867 ഘനയടി വീതം തമിഴ്‌നാട് കൊണ്ട് പോകുന്നുണ്ട്. ജലനിരപ്പ് 142 അടിയിലേക്കെത്തിയാല്‍ 2000 ഘനയടി തമിഴ്‌നാട്ടിലേക്കും ബാക്കി കേരളത്തിലേക്കും തുറന്നുവിടാനാണ് തമിഴ്‌നാടിന്റെ തീരുമാനം.

കുമളിയില്‍ മഴ കുറഞ്ഞിട്ടുണ്ടെങ്കിലും അണക്കെട്ടിന്റെ വൃഷ്ടിപ്രദേശത്തോട് ചേര്‍ന്നുള്ള തമിഴ്‌നാട് വനമേഖലയില്‍ മഴ തുടരുന്നതാണ് ജലനിരപ്പ് ഉയരാന്‍ കാരണം. മുല്ലപ്പെരിയാറില്‍ നിന്നുള്ള വെള്ളം ശേഖരിക്കുന്ന വൈഗ ഡാമില്‍ പരമാവധി സംഭരണ ശേഷി 71, ഇപ്പോള്‍ ജലനിരപ്പ് 69 അടിയെത്തി.

ഇടുക്കിയില്‍ 58.74 ശതമാനം വെള്ളം

ചെറുതോണി: മുല്ലപ്പെരിയാര്‍ തുറന്നാല്‍ വെള്ളം എത്തുന്ന ഇടുക്കി സംഭരണിയില്‍ അവശേഷിക്കുന്നത് 2364.56 അടി വെള്ളമാണ്. മൊത്തം സംഭരണ ശേഷിയുടെ 58.74 ശതമാനമാണിത്. കഴിഞ്ഞ വര്‍ഷത്തേക്കാള്‍ 15.74 അടി കുറവാണിത്.
കഴിഞ്ഞ വര്‍ഷം ഇതേ സമയം 2380.3 അടിയായിരുന്നു, 74.10%. ഇന്നലെ രാവിലെ വരെയുള്ള 24 മണിക്കൂറില്‍ 3.3 സെന്റിമീറ്റര്‍ മഴ ലഭിച്ചപ്പോള്‍ 6.122 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനാവശ്യമായ വെള്ളം ഒഴുകിയെത്തി. അതേസമയം മൂലമറ്റത്ത് നിന്നുള്ള വൈദ്യുതി ഉത്പാദനം 1.5 ദശലക്ഷം യൂണിറ്റില്‍ ക്രമീകരിച്ചിരിക്കുകയാണ് കെഎസ്ഇബി. പെരിയാറില്‍ വെള്ളം കുറവായതിനാല്‍ മുല്ലപ്പെരിയാര്‍ നിലവില്‍ തുറന്നാലും മറ്റ് പ്രശ്‌നങ്ങള്‍ക്ക് സാധ്യതയില്ല. ഇതിനൊപ്പം തന്നെ കൂടുതല്‍ വെള്ളം എത്തുന്നത് കെഎസ്ഇബിക്ക് ആശ്വാസവുമാകും.