ചെങ്ങന്നൂര്: എംസി റോഡില് കല്ലിശേരിയില് കെഎസ് ആര്ടിസിയുടെ സൂപ്പര്ഫാസ്റ്റ്, ഫാസ്റ്റ് പാസഞ്ചറുകള് കൂട്ടിയിടിച്ച് ഇരു ബസിന്റെയും ഡ്രൈവര്മാര് ഉള്പ്പടെ 45 ഓളം യാത്രക്കാര്ക്ക് പരിക്കേറ്റു. പരിക്കേറ്റ യാത്രക്കാരില് മൂന്ന് ശബരിമല തീര്ത്ഥാടകരും ഉണ്ട്. പരിക്കേറ്റവരെ കല്ലിശേരിയിലുള്ള സ്വകാര്യ ആശുപത്രിയില് പ്രവേശിപ്പിച്ചു.
ഇന്ന് വൈകിട്ട് എതിര്ദിശയില് വന്നകോട്ടയം – പിറവം ഫാസ്റ്റ് പാസഞ്ചര് ബസും തിരുവനന്തപുരത്തിനുള്ള സൂപ്പര്ഫാസ്റ്റ് ബസും കല്ലിശേരി ഉമയാറ്റുകര സെന്റ് തോമസ് ഓര്ത്തഡോക്സ് പള്ളിക്കു മുന്പിലായിരുന്നു അപകടം.പിറവം ബസ് മറ്റൊരു മുമ്പേ പോയ ഒരുവാഹനത്തെ ഓവര് ടേക്ക് ചെയ്യുന്നതിനിടയിലാണ് അപകടം ഉണ്ടായത്. ഇടിയുടെ ആഘാതത്തില് രണ്ടു ബസ്ഡ്രൈവര്മാരും ബസിന്റെ സ്റ്റീയറിങ് വീലിനിടയില്പെട്ട് ഞെരിഞ്ഞമര്ന്നിരിക്കുകയായിരുന്നു.
വളരെ ബുദ്ധിമുട്ടിയാണ് രക്ഷാപ്രവര്ത്തകര് ഇവരെ പുറത്തെടുത്തത്. പരിക്കേറ്റ യാത്രക്കാര്ക്ക് തലയ്ക്കും, കൈകാലുകള്ക്കുമാണ് ക്ഷതം സംഭവിച്ചിരിക്കുന്നത്. ബസിന്റെ ഗഌസ് കണ്ണില് തറച്ചു കയറിയ യാത്രക്കാരുണ്ട്. ക്രെയിന് ഉപയോഗിച്ചാണ് ഇരു ബസുകളും സംഭവസ്ഥലത്തു നിന്നും മാറ്റിയത്.
