തിരുവനന്തപുരം: കേരളത്തില്‍ കര്‍ഷകര്‍ക്ക് ജീവിക്കാന്‍ കഴിയാത്ത സാഹചര്യമാണെന്നും കര്‍ഷകര്‍ ആത്മഹത്യ ചെയ്യുമ്പോള്‍ ഇടതു സര്‍ക്കാര്‍ ദീര്‍ഘമായ ഉറക്കത്തിലാണെന്നും ഭാരതീയ കിസാന്‍ സംഘ് അഖിലേന്ത്യാ ജനറല്‍ സെക്രട്ടറി മോഹിനി മോഹന്‍ മിശ്ര.
ഭാരതീയ കിസാന്‍ സംഘ് കേരള ഘടകത്തിന്റെ നേതൃത്വത്തില്‍ നടന്ന കര്‍ഷക അവകാശ പ്രഖ്യാപന റാലി ഉദ്ഘാടനം ചെയ്യുകയായിരുന്നു അദ്ദേഹം. കര്‍ഷക ആത്മഹത്യയിലാണ് ഇപ്പോള്‍ കേരളം നമ്പര്‍ വണ്‍. ഈ ഭൂമി മുഴുവന്‍ കര്‍ഷകരുടേതാണ്. ഞങ്ങളാണ് ഈ ഭൂമിയുടെ ഉടമകള്‍. അധികാരത്തിലിരുന്ന സംസ്ഥാനങ്ങളിലെല്ലാം കര്‍ഷകരെ ദ്രോഹിക്കുന്ന നടപടികളായിരുന്നു ഇടത് സര്‍ക്കാരുകള്‍ കൈക്കൊണ്ടിരുന്നത്. അവിടങ്ങളില്‍ നിന്ന് ജനങ്ങള്‍ അവരെ പുറത്താക്കി. ഇപ്പോള്‍ ഇടത് സര്‍ക്കാര്‍ കേരളത്തില്‍ മാത്രമേ ഉള്ളൂ. ഇവിടെയും കര്‍ഷകദ്രോഹ നിലപാടുകള്‍ അവര്‍ തുടരുകയാണ്. കര്‍ഷകരെ ദ്രോഹിക്കുന്ന ഇടത് ഗവണ്‍മെന്റ് കേരളം വിടണം, അദ്ദേഹം ആവശ്യപ്പെട്ടു. കാര്‍ഷിക മേഖലയെ പ്രതിസന്ധിയില്‍ നിന്നും കരകയറ്റാനുള്ള സമഗ്രമായ ബദല്‍രേഖ സമ്മേളനത്തില്‍ അവതരിപ്പിച്ചു.
സംസ്ഥാന പ്രസിഡന്റ് ഡോ.അനില്‍ വൈദ്യമംഗലം അദ്ധ്യക്ഷനായി. ദേശീയ വൈസ് പ്രസിഡന്റ് ടി. പെരുമാള്‍, സംസ്ഥാന ജനറല്‍ സെക്രട്ടറി പി. നാരായണന്‍കുട്ടി, സംഘടനാ സെക്രട്ടറി പി. മുരളീധരന്‍, ഗോ സേവ സംയോജകന്‍ കെ. കൃഷ്ണന്‍കുട്ടി, ജനറല്‍ കണ്‍വീനര്‍ അഡ്വ.കെ. മോഹന്‍കുമാര്‍, സംസ്ഥാന കമ്മിറ്റിയംഗം എസ്. രാമചന്ദ്രന്‍ തുടങ്ങിയവര്‍ സംസാരിച്ചു.
കാര്‍ഷികോത്പന്നങ്ങള്‍ക്ക് ന്യായമായ വില ഉറപ്പുവരുത്തുക. അറുപതു വയസു കഴിഞ്ഞ കര്‍ഷകര്‍ക്ക് പ്രതിമാസം ഇരുപത്തിഅയ്യായിരം രൂപ പെന്‍ഷന്‍ അനുവദിക്കുക, സ്വന്തം ഉത്പന്നങ്ങള്‍ക്ക് വില നിശ്ചയിക്കാനുള്ള അവകാശം കര്‍ഷകനില്‍ നിക്ഷിപ്തമാക്കുക. തുടങ്ങി നൂറോളം ആവശ്യങ്ങള്‍ ഉന്നയിച്ചാണ് കര്‍ഷക അവകാശ പ്രഖ്യാപന റാലി നടത്തിയത്. പാളയം രക്തസാക്ഷി മണ്ഡപത്തിന് മുന്നില്‍ നിന്നാരംഭിച്ച റാലി ഗാന്ധിപാര്‍ക്കില്‍ സമാപിച്ചു. കേരളത്തിലെ പതിനാലു ജില്ലകളില്‍ നിന്നുമായി സ്ത്രീകളും കുട്ടികളുമുള്‍പ്പെടെ നൂറ് കണക്കിന് പേര്‍ റാലിയില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: