ചെന്നൈ : മുന് കാമുകനെ വാടകക്കൊലയാളികളെ ഉപയോഗിച്ച് കൊലപ്പെടുത്തിയ യുവതി അറസ്റ്റില്. തമിഴ്നാട്ടില് പൊന്നേരിയിലാണ് സംഭവം. പൊന്നേരി സ്വദേശിനി പ്രിയ(28)യാണ് അറസ്റ്റിലായത്. ഇവര് രണ്ട് കുട്ടികളുടെ അമ്മയാണ്.
വാടകക്കൊലയാളികള്ക്കായി പൊലീസ് അന്വേഷണം നടക്കുകയാണ്.
കൊറിയര് കമ്പനിയില് ജോലി ചെയതു വന്ന ഗോപാലകൃഷ്ണന് (27) ആണ് കൊല്ലപ്പെട്ടത്. ഭര്ത്താവുമായി വേര്പിരിഞ്ഞ് കഴിഞ്ഞിരുന്ന പ്രിയ, ഗോപാലകൃഷ്ണനുമായി അടുപ്പത്തിലായിരുന്നു. ആദ്യ വിവാഹത്തില് പ്രിയയ്ക്ക് രണ്ട് കുട്ടികളുണ്ട്. എന്നാല് മറ്റൊരാളുമായി കൂടി അടുപ്പം സ്ഥാപിച്ച യുവതി പതുക്കെ ഗോപാലകൃഷ്ണനില് നിന്ന് അകലാന് തുടങ്ങി.
പ്രിയയ്ക്ക് മറ്റൊരാളുമായി ബന്ധമുണ്ടെന്ന് അറിഞ്ഞ ഗോപാലകൃഷ്ണന് പ്രിയയുമായി വഴക്കിടാറുണ്ടായിരുന്നു. പുതിയ ബന്ധം അവസാനിപ്പിക്കണമെന്നാവശ്യപ്പെട്ടതിനെ തുടര്ന്നാണ് കൊലപാതകത്തിന് പ്രിയ തീരുമാനിച്ചത്. ഇതിനായി നാല് വാടകക്കൊലയാളികളെ ഏര്പ്പാടാക്കിയെന്നാണ് പൊലീസ് വെളിപ്പെടുത്തിയത്.
കൊലപാതകം ആസൂത്രണം ചെയ്ത പ്രിയ ബുധനാഴ്ച രാത്രി പൊന്നേരി നഗരസഭാ ഓഫീസിന് സമീപം എത്താന് ഗോപാലകൃഷ്ണനോട് ആവശ്യപ്പെട്ടു.രാത്രിയോടെ പ്രിയയെ കാണാന് പുറപ്പെട്ട ഗോപാലകൃഷ്ണനെ വാടകക്കൊലയാളികള് തട്ടികൊണ്ട് പോയി കൊലപ്പെടുത്തുകയുമായിരുന്നു.
ഗോപാലകൃഷ്ണന്റെ മൃതദേഹം പൊലീസ് കണ്ടെത്തിയതിനെ തുടര്ന്നുള്ള അന്വേഷണത്തിലാണ് കൊലപാതക വിവരം പുറത്തുവന്നത്.
