കോട്ടയം: മുഖ്യമന്ത്രിയും മന്ത്രിമാരും എഴുന്നള്ളുന്ന നവ കേരള ബസ് കോട്ടയം വിട്ടപ്പോള് പൊതുജനത്തിന് യാതൊരു പ്രയോജനവും കിട്ടാതെ ദുരിതം മാത്രമാണ് സമ്മാനിച്ചതെന്ന് ബിജെപി മധ്യമേഖല അധ്യക്ഷന് എന്. ഹരി പറഞ്ഞു.
ആകെ ആശ്വസിക്കാന് വകയുള്ളത് കേരളാ കോണ്ഗ്രസിന് മാത്രമാണ്. സ്വന്തം തട്ടകമായ പാലായില് വച്ചു തന്നെ മുഖ്യമന്ത്രി കോട്ടയം എം.പിയെ പരിഹസിക്കുകയും കാര്യങ്ങള് മനസ്സിലാക്കാന് ശേഷി ഇല്ലാത്തവന് എന്ന് പറഞ്ഞു ഇകഴ്ത്തുകയും ചെയ്തു.
ആത്മാഭിമാനം തെല്ലെങ്കിലും ബാക്കിയുണ്ടെങ്കില് കേരളാ കോണ്ഗ്രസ് മുന്നണി വിട്ട് പുറത്തു വരണമെന്നും അദേഹം വിമര്ശിച്ചു. നാടിന്റെ സമഗ്ര വികസനം ചര്ച്ച ചെയ്യും എല്ലാ പരാതികള്ക്കും പരിഹാരം കാണും തുടങ്ങിയ മോഹന വാഗ്ദാനങ്ങളില് വിശ്വസിച്ച് സദസ്സിനെത്തിയ പൗര സമൂഹത്തെ നിരാശരാക്കി എന്ന് മാത്രമല്ല ഇത് കേവലം ഇലക്ഷന് പ്രചരണം മാത്രമെന്ന് സൂചിപ്പിക്കുകയും ചെയ്തു.
റബ്ബറിന് 250 രൂപ താങ്ങുവില പ്രഖ്യാപിക്കും എന്ന എല്ഡിഎഫ് വാഗ്ദാനം പോലും പാലിക്കുമെന്ന് പറയാതെ റബ്ബര് ബോര്ഡ് നേരിട്ട് നടത്തുന്ന പ്രവര്ത്തനങ്ങളില് പോലും അവകാശവാദം ഉന്നയിച്ച് തന്റേതാക്കുന്ന നയവും അതിന് പാര്ട്ടി പത്രത്തിലൂടെയും മറ്റ് വേദികളിലൂടെയും പ്രചരണവും നടത്തുന്നു. ഇത് റബ്ബറിന്റെ വിഷയമെങ്കില് ലോക ടൂറിസം ഭൂപടത്തില് സ്ഥാനം നേടിയ കുമരകത്തിന്റെ വികസനത്തെ കുറിച്ച് യാതൊരു കാഴ്ച്ചപ്പാടും മുന്നോട്ടു വയ്ക്കാന് പറ്റിയില്ലെന്നും എന്. ഹരി വ്യക്തമാക്കി.
ഇതിലൂടെ പ്രത്യക്ഷമായും പരോക്ഷമായും ലഭിക്കേണ്ട വരുമാനം കളഞ്ഞ് കുളിച്ചു. ഇന്ത്യയിലെ തന്നെ ഏറ്റവും വലിയ തീര്ത്ഥാടന കേന്ദ്രമായ ശബരിമലയുടെ പ്രവേശന കവാടവും മതനിരപേക്ഷതയുടെ സംഗമ ഭൂമിയുമായ എരുമേലി മറ്റ് ഇടത്താവളങ്ങള് എന്നിവ അസൗകര്യത്താല് വീര്പ്പുമുട്ടുന്നു. അയ്യപ്പന്മാരുടെ കാണിയ്ക്ക പണത്തോട് മാത്രം സ്നേഹം പ്രകടിപ്പിക്കുമ്പോള് തീര്ത്ഥാടകരെ തിക്കിലും തിരക്കിലും വീര്പ്പുമുട്ടിക്കുന്നു.
അതിലും വലിയ കാപട്യം സഹകരണ മേഖലയിലെ സര്വ്വ സാധാരണക്കാരായ നിക്ഷേപകരുടെ നഷ്ടപ്പെട്ട പണത്തെക്കുറിച്ച് മുഖ്യമന്ത്രിയോ മറ്റ് മന്ത്രിമാരോ ഒന്നു സൂചിപ്പിക്കാന് പോലും തയ്യാറായില്ല. കേന്ദ്രത്തെ കുറ്റം പറഞ്ഞു കൊണ്ട് കാലിയായ ഖജനാവിന്റെ താക്കോലുമായി നവകേരള ബസിന് ഡബിള് ബെല്ലടിക്കുമ്പോള് പാവം കെഎസ്ആര്ടിസി ജീവനക്കാരുടേയും പെന്ഷന്കാരുടേയും കണ്ണുനീരും സാധാരണക്കാരന്റെ ശാപവും മാത്രമാണ് സര്ക്കാര് മുതല്ക്കൂട്ടെന്നും അദേഹം പറഞ്ഞു.
