ശബരിമല: ശബരിമലയില്‍ പോലീസ് പ്രവര്‍ത്തനം അമ്പേ പാളിയതോടെ സ്പെഷ്യല്‍ ഓഫീസര്‍മാരെ നീക്കി. സന്നിധാനം, പമ്പ, നിലയ്‌ക്കല്‍ സ്പെഷ്യല്‍ ഓഫീസര്‍മാരെയാണ് ഇന്നലെ നീക്കിയത്. സന്നിധാനത്തടക്കം തിരക്ക് നിയന്ത്രിക്കുന്നതില്‍ പോലീസിന് സംഭവിച്ച പാളിച്ചയും, പമ്പ- സന്നിധാനം ശരണപാതയില്‍ മണിക്കൂറുകള്‍ കാത്തു നിന്നിട്ടും ദര്‍ശനം പൂര്‍ത്തിയാക്കാന്‍ സാധിക്കാതെ തീര്‍ത്ഥാടകര്‍ മലയിറങ്ങേണ്ടി വന്ന സാഹചര്യവും കണക്കിലെടുത്താണ് ഓഫീസര്‍മാരെ നീക്കിയത്. സന്നിധാനം സ്പെഷ്യല്‍ ഓഫീസര്‍ കെ.ഇ. ബൈജു, പമ്പ സ്പെഷ്യല്‍ ഓഫീസര്‍ പൂങ്കുഴലി, നിലക്കല്‍ സ്പെഷ്യല്‍ ഓഫീസര്‍ സോജന്‍ എന്നിവരെയാണ് ചുമതലയില്‍ നിന്നും നീക്കം ചെയ്തത്. പതിനാലാം തീയതി വരെയായിരുന്നു മൂവരുടെയും കാലാവധി. സന്നിധാനം സ്പെഷ്യല്‍ ഓഫീസറായി കൊച്ചി ഡിസിപി സുദര്‍ശനന്‍, പമ്പയിലേക്ക് എസ്. മധുസൂദനന്‍, നിലയ്‌ക്കലില്‍ കെ.വി. സന്തോഷിനെയുമാണ് നിയമിച്ചിരിക്കുന്നത്.
ശബരീശ ദര്‍ശനത്തിനായി പമ്പയില്‍ നിന്നും മല കയറിയ തീര്‍ത്ഥാടകര്‍ക്ക് കഴിഞ്ഞ ഏതാനും ദിവസങ്ങളായി 15 മണിക്കൂറിലേറെ നേരം കാത്തുനിന്ന ശേഷമാണ് ദര്‍ശനം ലഭിച്ചത്. മണിക്കൂറുകള്‍ കാത്തുനിന്നിട്ടും പാതി വഴിയില്‍ കുടുങ്ങിപ്പോയ കൊച്ചു മാളികപ്പുറങ്ങളും പ്രായാധിക്യം ഏറിയവരുമായ നൂറുകണക്കിന് തീര്‍ത്ഥാടകര്‍ ശബരിമലയുടെ ചരിത്രത്തില്‍ ആദ്യമായി ദര്‍ശനം പൂര്‍ത്തിയാക്കാതെ മലയിറങ്ങി പന്തളം ക്ഷേത്രത്തിലെത്തി ചടങ്ങുകള്‍ പൂര്‍ത്തിയാക്കി മടങ്ങുന്ന സാഹചര്യവും ഇക്കുറി ഉണ്ടായി. ഈ സംഭവങ്ങള്‍ പത്ര- ദൃശ്യ മാധ്യമങ്ങള്‍ വാര്‍ത്തയാക്കിയതിന് പിന്നാലെയാണ് നടപടി. തിരക്ക് നിയന്ത്രിക്കുന്നതില്‍ മുന്‍ പരിചയം ഉള്ള ഉദ്യോഗസ്ഥരെ കൂടുതലായി നിയോഗിക്കുമെന്ന് ദേവസ്വം റവന്യൂ സ്പെഷ്യല്‍ സെക്രട്ടറി എം.ജി രാജമാണിക്യം പറഞ്ഞു.
ശബരിമല തീര്‍ത്ഥാടകര്‍ക്ക് ദര്‍ശനത്തോടൊപ്പം സുരക്ഷയും ഉറപ്പാക്കുമെന്ന് ദേവസ്വം സ്‌പെഷല്‍ സെക്രട്ടറി എം.ജി രാജമാണിക്യം. ശബരിമലയിലെ സ്ഥിതിഗതികള്‍ മെച്ചപ്പെടുത്തുന്നതിനായി നവകേരള സദസ്സിനിടയില്‍ മുഖ്യമന്ത്രി പിണറായി വിജയന്‍ വിളിച്ചുചേര്‍ത്ത ഓണ്‍ലൈന്‍ യോഗത്തിന് ശേഷം ക്രമീകരണങ്ങള്‍ വിശദീകരിക്കുകയായിരുന്നു അദ്ദേഹം.
കുസാറ്റിലെ പോലെയുള്ള അപകടസാധ്യതകള്‍ മുന്നില്‍ കണ്ടുകൊണ്ട് തന്നെ തിരക്ക് ശ്രദ്ധയോടെയാണ് പോലീസ് കൈകാര്യം ചെയ്യുന്നത്. ഇതിന്റെ അടിസ്ഥാനത്തിലാണ് സന്നിധാനത്തെ തിരക്കനുസരിച്ചാണ് ഭക്തരെ മുകളിലേക്ക് കടത്തി വിടുന്നതെന്നും തിരക്ക് നിയന്ത്രണ വിധേയമാണെന്നും അദ്ദേഹം പറഞ്ഞു. വെര്‍ച്ച്വല്‍ ക്യു വഴിയുള്ള സന്ദര്‍ശനം 80,000 ആയി ചുരുക്കിയത് ഭാവിയിലെ തിരക്ക് ക്രമീകരണം സുഗമമാക്കും. സ്‌പോട്ട് ബുക്കിങ് വഴി ഏകദേശം ഇരുപതിനായിരം പേരും പുല്ല്‌മേട് കാനനപാതയിലൂടെ ഏകദേശം അയ്യായിരം പേരുമടക്കം ദിനം പ്രതി 1,20,000 ത്തിലധികം ഭക്തരാണ് എത്തുന്നത്. പതിനെട്ടാം പടിയിലൂടെ ഒരു മണിക്കൂറില്‍ 4200 പേരെയാണ് കയറ്റാന്‍ സാധിക്കുക. ഈ സീസണില്‍ എത്തിചേരുന്നവരില്‍ പ്രായമായവരും കുട്ടികളും മുപ്പത് ശതമാനത്തോളമാണ്. ഇവരുടെ സുരക്ഷ കൂടി ഉറപ്പാക്കി മണിക്കൂറില്‍ 3800- 3900 പേരെയെ കയറ്റാന്‍ സാധിക്കുകയുള്ളൂ. ഇതിന്റെ അടിസ്ഥാനത്തിലാണ് പമ്പ – നിലയ്‌ക്കല്‍ വരെയുള്ള സ്ഥലങ്ങളില്‍ തിരക്ക് അനുഭവപ്പെടുന്നത്. സന്ദര്‍ശകരെ ബുദ്ധിമുട്ടിക്കാതെ സ്‌പോട്ട് ബുക്കിങ് പരിമിതിപ്പെടുത്തി ക്രമീകരണം ഏര്‍പ്പെടുത്തുകയും ചെയ്യും. ഭക്തര്‍ക്ക് നടപ്പന്തലിലും ക്യൂ കോംപ്ലക്സിലും കുടിവെള്ളവും ബിസ്‌ക്കറ്റും പ്രാഥമിക സൗകര്യങ്ങളും കൂടുതല്‍ സജ്ജമാക്കിയിട്ടുണ്ടെന്നും അദ്ദേഹം പറഞ്ഞു.
കൂടാതെ ഗതാഗതം സുഗമമാക്കുന്നതിന് പാര്‍ക്കിങ് സൗകര്യം കൃത്യമായി തന്നെ ക്രമീകരിക്കും. ഭക്തജനങ്ങള്‍ക്കായി സൗകര്യങ്ങള്‍ ഇനിയും മെച്ചപ്പെടുത്താന്‍ എല്ലാ മാര്‍ഗങ്ങളും സ്വീകരിക്കും. സന്നിധാനം പമ്പ എന്നിവിടങ്ങളിലായി 2300 ഓളം ടോയ്‌ലറ്റുകള്‍ സജ്ജമാക്കിയിട്ടുമെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: