തിരുവനന്തപുരം: കേരള ഗവര്ണറെ തെരുവില് തടഞ്ഞു നിര്ത്തി ശല്യപ്പെടുത്തുന്ന നാണംകെട്ട രാഷ്ട്രീയം പരിഷ്കൃത ജനാധിപത്യ സമൂഹത്തിന് അപമാനകരമാണെന്ന് മുന് മിസോറാം ഗവര്ണര് കുമ്മനം രാജശേഖരന് പറഞ്ഞു. തന്നില് നിക്ഷിപ്തമായ ഭരണഘടനാപരമായ ഉത്തവാദിത്ത്വം നിര്വഹിക്കുകമാത്രമെ ഗവര്ണര് ചെയ്യുന്നുള്ളു.
തങ്ങള്ക്ക് അഹിതമായതും പ്രതികൂലമായതുമായ യാതൊന്നും ചെയ്യാന് ഗവര്ണറെ അനുവദിക്കില്ലെന്നും, തങ്ങളുടെ വരുതിയില് അദേഹം നിന്നുകൊടുക്കണമെന്നുമുള്ള സിപിഎമ്മിന്റെ മുന്നറിയിപ്പും ദുശ്ശാഠ്യവും സമ്മര്ദ്ദതന്ത്രവുമാണ് തിങ്കളാഴ്ച ഗവര്ണര്ക്കെതിരെ നടന്ന അതിക്രമത്തിനു പിന്നിലുള്ളത്.
ഗവര്ണര്ക്ക് പോലും കേരളത്തില് സ്വതന്ത്രമായി വഴിയാത്ര സാധ്യമല്ലെന്ന ദുഃസ്ഥിതി ക്രമസമാധാന നിലയുടെ ദയനീയമായ തകര്ച്ചയെയാണ് സൂചിപ്പിക്കുന്നത്. മുഖ്യമന്ത്രി സര്വ്വവിധ സന്നാഹങ്ങളോടെ തെരുവില് സ്വതന്ത്രമായി യാത്ര ചെയ്യുമ്പോള് ഗവര്ണര് യാതൊരുവിധ സുരക്ഷയുമില്ലാതെ യാത്ര ചെയ്യേണ്ടി വരുന്നു.
തടസം സൃഷ്ടിച്ചതുമൂലം കാറില് നിന്നിറങ്ങി പ്രതിഷേധക്കാരെ ഗവര്ണര് നേരിടേണ്ടിവരുന്ന ഗതികേട് കേരളത്തില് മാത്രമേ കാണാന് കഴിയുവെന്നും കുമ്മനം രാജശേഖരന് വ്യക്തമാക്കി.
