കാനത്തിന്റെ നിര്യാണത്തിൽ ബിജെപി അനുശോചിച്ചു

സിപിഐ സംസ്ഥാന സെക്രട്ടറി കാനം രാജേന്ദ്രന്റെ നിര്യാണത്തിൽ ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ അനുശോചിച്ചു. ഇടതുപക്ഷത്തെ സൗമ്യമുഖമായിരുന്നു അദ്ദേഹം. തന്റെ നിലപാടുകൾ വെട്ടിത്തുറന്ന് പറയാനുള്ള ആർജ്ജവം കാണിച്ച വ്യക്തിയായിരുന്നു അദ്ദേഹം. സിപിഐയുടെ ജനകീയ മുഖമായിരുന്ന അദ്ദേഹം ഒന്നാം പിണറായി സർക്കാരിന്റെ കാലത്ത് എടുത്ത പല നിലപാടുകളും പ്രശംസനീയമാണ്. എതിർ രാഷ്‌ട്രീയ ചേരിയിലായിരുന്നുവെങ്കിലും കാനവുമായി എന്നും നല്ല വ്യക്തിബന്ധമായിരുന്നു പുലർത്തിയിരുന്നത്. കെ.സുരേന്ദ്രൻ പറഞ്ഞു

മാന്യനായ കമ്മ്യൂണിസ്റ്റായിരുന്നു കാനം രാജേന്ദ്രനെന്ന് ബിജെപി നേതാവ് പി കെ കൃഷ്ണദാസ് അനുശോചന സന്ദേശത്തില്‍ പറഞ്ഞു. രാഷ്‌ട്രീയ വിഷയങ്ങളില്‍ ഉറച്ച നിലപാടുകളുളളതിനാല്‍ അഭിപ്രായം ഉച്ചത്തില്‍ പറയാന്‍ അദ്ദേഹത്തിനു കഴിഞ്ഞിരുന്നു. ഇടതുമുന്നണിയിലെ തിരുത്തല്‍ ശക്തിയായി ജനം കാനത്തില്‍ പ്രതീക്ഷ അര്‍പ്പിച്ചിരുന്നു. കറകളഞ്ഞ കമ്മ്യൂണിസ്റ്റായി നിലകൊള്ളുമ്പോഴും രാഷ്‌ട്രീയ എതിരാളികളുമായി ഹൃദയ ബന്ധം കാനം സൂക്ഷിച്ചിരുന്നു. കൃഷ്ണദാസ് പറഞ്ഞു