തിരുവനന്തപുരം: തിരുവനന്തപുരത്ത് യുവ ഡോക്ടര് ഷഹ്ന ആത്മഹത്യ ചെയ്ത സംഭവത്തില് സുഹൃത്തായ ഡോ. റുവൈസിനെ അറസ്റ്റില്. മെഡിക്കല് കോളേജ് പോലീസാണ് റുവൈസിനെ അറസ്റ്റ് ചെയ്തത്. ഇയ്യാളെ ഇന്ന് വൈകുന്നേരത്തോടെ കോടതിയില് ഹാജരാക്കുമെന്നാണ് റിപ്പോര്ട്ട്.
ഇന്ന് പുലര്ച്ചെ കൊല്ലം കരുനാഗപ്പള്ളിയിലെ ബന്ധുവിന്റെ വീട്ടില് നിന്നായിരുന്നു റുവൈസിനെ കസ്റ്റിഡിയിലെടുത്തത്. തുടര്ന്ന് മണിക്കൂറുകള് നീണ്ട ചോദ്യം ചെയ്യലിനൊടുവിലാണ് അറസ്റ്റ് രേഖപ്പെടുത്തിയത്. വെഞ്ഞാറമൂട് സ്വദേശിനി പിജി വിദ്യാര്ത്ഥിനി ഡോക്ടര് ഷഹനയുടെ മരണത്തില് സുഹൃത്തായ ഡോ റുവൈസിനെതിരെ കഴിഞ്ഞ ദിവസമാണ് പോലീസ് കേസെടുത്തത്. ഡോ റുവൈസിനെതിരെ ആത്മഹത്യാ പ്രേരണ കുറ്റവും സ്ത്രീധന നിരോധന നിയമത്തിലെ വകുപ്പുകളും ചുമത്തി.
ജാമ്യമില്ലാ വകുപ്പുകളാണ് ചുമത്തിയിട്ടുളളത്. ഇയാള്ക്കെതിരെ തെളിവുകളുണ്ടെന്ന് പൊലീസ് പറഞ്ഞു. മെഡിക്കല് പിജി അസോസിയേഷന് സംസ്ഥാന പ്രസിഡന്റായ ഡോ റുവൈസിനെ ഷഹനയുടെ ആത്മഹത്യയെ തുടര്ന്നുളള ആരോപണത്തെ തുടര്ന്ന് സ്ഥാനത്ത് നിന്ന് നീക്കിയിരുന്നു. ഷഹനയ്ക്ക് ഇയാളുമായി അടുപ്പമുണ്ടായിരുന്നു.
ഇവരുടെ വിവാഹവും നിശ്ചയിച്ചിരുന്നു. എന്നാല് വലിയ സ്ത്രീധനം റുവൈസിന്റെ വീട്ടുകാര് ചോദിച്ചതോടെ വിവാഹം മുടങ്ങിയെന്ന് ഷഹനയുടെ ബന്ധുക്കള് ആരോപിച്ചു. തിരുവനന്തപുരം മെഡിക്കല് കോളേജിലെ ഓര്ത്തോ വിഭാഗം പിജി വിദ്യാര്ത്ഥിയാണ് ഡോ റുവൈസ്. ഇവിടെ സര്ജറി വിഭാഗത്തില് പിജി വിദ്യാര്ത്ഥിയായിരുന്നു ഷെഹന. ഷഹനയെ ഫ്ലാറ്റില് അനസ്തേഷ്യക്കുള്ള മരുന്ന് കുത്തിവെച്ച് മരിച്ച നിലയില് കഴിഞ്ഞ ദിവസമാണ് കണ്ടെത്തിയത്.
