ന്യൂദല്‍ഹി: അഞ്ചു സംസ്ഥാനങ്ങളിലേക്ക് നടന്ന നിയമസഭാ തെരഞ്ഞെടുപ്പില്‍ വിജയം പ്രതീക്ഷിച്ചിരുന്ന കോണ്‍ഗ്രസിന് തോല്‍വി നല്‍കിയത് കനത്ത ആഘാതം. ദല്‍ഹി അക്ബര്‍ റോഡിലെ കോണ്‍ഗ്രസ് ദേശീയ ആസ്ഥാനം ശോകമൂകമായിരുന്നു. പ്രധാന നേതാക്കളാരും തന്നെ അവിടേക്ക് എത്തിയില്ല.
കോണ്‍ഗ്രസിന്റെ ദേശീയ ആസ്ഥാനത്ത് വിജയാഘോഷത്തിനുള്ള ഒരുക്കങ്ങളെല്ലാം ശനിയാഴ്ച രാത്രി തന്നെ പൂര്‍ത്തിയായിരുന്നു. കേരളത്തിലെ ഉള്‍പ്പെടെയുള്ള ചില മാധ്യമങ്ങള്‍ തത്സമയ സംപ്രേഷണത്തിനുള്ള സംവിധാനങ്ങളും സജ്ജമാക്കി. എക്സിറ്റ് പോളുകള്‍ പ്രവചിച്ച ഫലമായിരുന്നു കോണ്‍ഗ്രസും പ്രതീക്ഷിച്ചത്. അതിനാല്‍ തന്നെ വിജയം സുനിശ്ചിതമാണെന്ന് നേതാക്കളും കണക്കുകൂട്ടി.
ആഘോഷങ്ങള്‍ക്കുള്ള വാദ്യ ഉപകരണങ്ങളും കലാകാരന്മാരും രാവിലെ തന്നെയെത്തി. വോട്ടെണ്ണല്‍ ആരംഭിച്ചതിനു പിന്നാലെ കൊട്ടുംപാട്ടുമായി ആഘോഷം തുടങ്ങി. ഒരു ഭാഗത്ത് പ്രവര്‍ത്തകര്‍ക്കുള്ള ഭക്ഷണവിതരണവും. എന്നാല്‍ ആഘോഷവും സന്തോഷവും അധികനേരം നീണ്ടുനിന്നില്ല. പാര്‍ട്ടി തോല്‍വിയേറ്റുവാങ്ങുന്നുവെന്ന് തിരിച്ചറിഞ്ഞതോടെ ആഘോഷങ്ങളെല്ലാം നിര്‍ത്തി. സ്ഥലത്ത് ഉണ്ടായിരുന്ന പ്രവര്‍ത്തകരും മെല്ലെ പിന്‍വാങ്ങി. കോണ്‍ഗ്രസ് വിജയിക്കുമെന്ന പ്രതീക്ഷയില്‍ പാര്‍ട്ടി പതാകകളും ഷാളുകളും വില്‍ക്കാനെത്തിയ കച്ചവടക്കാര്‍ കുറച്ചുസമയം കാത്തിരുന്നെങ്കിലും പിന്നാലെ അവരും പോയി.
പ്രതികരിക്കാൻ ഇവിടെ എഴുതുക: