ബംഗളുരു : വിജയ് ഹസാരെ ട്രോഫിയില് സിക്കിമിനെ ഏഴ് വിക്കറ്റിനു പരാജയപ്പെടുത്തി കേരളം. ആദ്യം ബാറ്റ് ചെയ്ത സിക്കിമിനെ 83 റണ്സിന് വരിഞ്ഞുകെട്ടിയ കേരളം 13.2 ഓവറില് മൂന്ന് വിക്കറ്റ് നഷ്ടത്തില് ലക്ഷ്യം കണ്ടു.
കേരളത്തിനായി കൃഷ്ണ പ്രസാദ് പുറത്താവാതെ 38 റണ്സ് നേടി. അഞ്ച് മത്സരങ്ങളില് നാലെണ്ണം വിജയിച്ച കേരളം ഇതോടെ ഗ്രൂപ്പില് രണ്ടാം സ്ഥാനം നിലനിര്ത്തി.
രോഹന് കുന്നുമ്മലും കൃഷ്ണ പ്രസാദും ചേര്ന്ന് മികച്ച തുടക്കമാണ് കേരളത്തിന് നല്കിയത്. രോഹന് ആക്രമിച്ചുകളിച്ചപ്പോല് കൃഷ്ണ പ്രസാദ് ക്രീസില് ഉറച്ചുനിന്നു. രോഹന് കുന്നുമ്മല് 18 പന്തില് 25 റണ്സ് നേടി പുറത്തായി. അജ്നാസ് പിഎം (10), സല്മാന് നിസാര് (2) എന്നിവര് വേഗം പുറത്തായി.
കേരളത്തിനായി അഖില് സ്കറിയ, അഭിജിത്ത് പ്രവീണ്, മിധുന് എസ് എന്നിവര് മൂന്ന് വിക്കറ്റ് വീതം വീഴ്ത്തി. ക്യാപ്റ്റന് സഞ്ജു സാംസണ് ഓരോവര് എറിഞ്ഞ് 3 റണ്സ് വിട്ടുനല്കി. സിക്കിമിന് വേണ്ടി അങ്കുര് 18 റണ്സ് നേടി ടോപ്പ് സ്കോറര് ആയി.
