കൊച്ചി: ലൈംഗിക അതിക്രമ കേസില്‍ പ്രതിയായ ഹൈക്കോടതിയിലെ സീനിയര്‍ ഗവണ്‍മെന്റ് പ്ലീഡര്‍ പി.ജി. മനുവിന്റെ രാജി എഴുതി വാങ്ങി. രാജിക്കത്ത് അഡ്വക്കേറ്റ് ജനറല്‍ നിയമ സെക്രട്ടറിക്ക് കൈമാറും. അഡ്വ.പി.ജി മനുവിനെതിരെ യുവതിയുടെ പരാതിയില്‍ ചോറ്റാനിക്കര പോലീസ് കേസ് രജിസ്റ്റര്‍ ചെയ്തിരുന്നു. പീഡന വിവരം പുറത്തു പറയരുതെന്ന് ഭീഷണിപ്പെടുത്തിയതായും യുവതി പരാതിപ്പെട്ടു. 2018ല്‍ നടന്ന പീഡന കേസില്‍ ഇരയായ യുവതി പോലീസ് ഉദ്യോഗസ്ഥന്‍ പറഞ്ഞതിന്റെ അടിസ്ഥാനത്തിലാണ് നിയമോപദേശത്തിനായി അഭിഭാഷകനായ പി.ജി. മനുവിനെ സമീപിക്കുന്നത്.
നിയമസഹായം നല്കാന്‍ എന്ന പേരില്‍ യുവതിയെ കടവന്ത്രയിലെ ഓഫീസില്‍ വിളിച്ചുവരുത്തി പീഡിപ്പിച്ചെന്നാണ് പരാതി. മാനസികമായി തകര്‍ന്ന പെണ്‍കുട്ടി വീട്ടുകാരോട് ആദ്യം വിവരം പറഞ്ഞില്ലെന്ന് അഭിഭാഷക പറയുന്നു. കഴിഞ്ഞ ഒക്ടോബറില്‍ വീണ്ടും ഓഫീസില്‍വച്ചു പീഡനം നടന്നുവെന്നും യുവതിയുടെ വീട്ടിലെത്തി പീഡിപ്പിച്ചുവെന്നും ആലുവ റൂറല്‍ എസ്പിക്ക് നല്കിയ പരാതിയില്‍ പറയുന്നു.
പീഡിപ്പിച്ചശേഷം സ്വകാര്യ ചിത്രങ്ങള്‍ മൊബൈല്‍ ഫോണില്‍ പകര്‍ത്തിയെന്നും യുവതി പോലീസിന് മൊഴി നല്കി. അതിന്റെ അടിസ്ഥാനത്തില്‍ ഐടി ആക്ട് അടക്കമുള്ള വകുപ്പുകളും ചുമത്തിയാണ് കേസെടുത്തത്. പെണ്‍കുട്ടിയുടെ വീട്ടില്‍ വിളിച്ച് പോലീസില്‍ പരാതിപ്പെടരുതെന്ന് മനു സമ്മര്‍ദം ചെലുത്തിയെന്നും രമ്യമായി പരിഹരിക്കണമെന്ന് ആവശ്യപ്പെട്ടതായും യുവതിയുടെ അഭിഭാഷക പറഞ്ഞു.
പ്രതികരിക്കാൻ ഇവിടെ എഴുതുക: