എറണാകുളം: ബലാത്സംഗ കേസിൽ നിയമ സഹായം തേടിയെത്തിയ യുവതിയെ വീണ്ടും ബലാത്സംഗത്തിന് ഇരയാക്കിയ സംഭവത്തിൽ ഹൈക്കോടതി സീനിയർ ഗവൺമെന്റ് പ്ലീഡർ പിജി മനുവിനെ പുറത്താക്കി. പ്രതിയിൽ നിന്നും രാജിക്കത്ത് എഴുതി വാങ്ങിയെന്ന് അഡ്വ.ജനറൽ വ്യക്തമാക്കി.
യുവതിയുടെ പരാതിയുടെ അടിസ്ഥാനത്തിലാണ് നീക്കം. ബലാത്സംഗം, സ്ത്രീത്വത്തെ അപമാനിക്കൽ, ഐടി ആക്ട് എന്നീ വകുപ്പുകളിലാണ് കേസെടുത്തിരിക്കുന്നത്. ഇതിന്റെ പശ്ചാത്തലത്തിൽ അഭിഭാഷകനെതിരെ തുടർ നടപടി സ്വീകരിക്കുമെന്ന് ചോറ്റാനിക്കര പോലീസ് അറിയിച്ചു.
പിജി മനുവിനെ കണ്ടെത്തി നോട്ടീസ് നൽകുകയും മൊഴി രേഖപ്പെടുത്തിയതിന് ശേഷം അറസ്റ്റ് ഉൾപ്പെടെയുള്ള നടപടികളിലേക്ക് കടക്കുമെന്നും പോലീസ് വ്യക്തമാക്കി. 2018-ൽ നടന്ന ബലാത്സംഗ കേസിൽ നിയമ സഹായം തേടിയാണ് യുവതി പിജി മനുവിന്റെ പക്കലെത്തിയത്.
കേസിൽ പരമാവധി നിയമ സഹായം നൽകാമെന്ന് പറഞ്ഞ അഭിഭാഷകൻ ബലാത്സംഗം ചെയ്‌തെന്ന് യുവതിയുടെ പരാതിയിൽ പറയുന്നു. 2023 ഒക്ടോബർ പത്തിനാണ് ഇയാൾ യുവതിയെ ബലാത്സംഗം ചെയ്തത്.
പ്രതികരിക്കാൻ ഇവിടെ എഴുതുക: