ഡെറാഡൂണ്: ഉത്തരകാശിയിലെ സില്ക്യാര ദന്തല്ഗാവ് തുരങ്കത്തിനുള്ളില് നിന്ന് രക്ഷപ്പെടുത്തിയ 41 തൊഴിലാളികളെയും ഋഷികേശിലെ എയിംസ് ആശുപത്രിയിലേക്ക് മാറ്റി. വ്യോമസേനയുടെ ചിനൂക്ക് ഹെലികോപ്റ്ററിലാണ് ഇവരെ എയിംസില് എത്തിച്ചത്. തുരങ്കത്തില് നിന്ന് മൂന്ന് കിലോമീറ്റര് അകലെയുള്ള ചിന്യാലിസോര് കമ്മ്യൂണിറ്റി ഹെല്ത്ത് സെന്ററിലാണ് ഇവരെ ചൊവ്വാഴ്ച രാത്രി തുരങ്കത്തില് നിന്ന് നേരെ എത്തിച്ചത്. ഇവര്ക്കായി പ്രത്യേകം വാര്ഡും ഇവിടെ സജ്ജമാക്കിയിരുന്നു.
തൊഴിലാളികള്ക്കാര്ക്കും പരിക്കുകളൊന്നുമില്ലെങ്കിലും മുന്കരുതലിന്റെ ഭാഗമായാണ് എയിംസിലേക്ക് മാറ്റിയത്. ഇവിടെ ഇവര് 24 മണിക്കൂര് നിരീക്ഷണത്തില് കഴിയും. കൂടുതല് ആരോഗ്യ പരിശോ ധനകള് നടത്തുകയും ചെയ്യും. 17 ദിവസം സൂര്യപ്രകാശം തട്ടാത്തതിനെ തുടര്ന്നോ മറ്റോ എന്തെങ്കിലും ആരോഗ്യ പ്രശ്നങ്ങളുണ്ടോ എന്ന് നിരീക്ഷിക്കും. ചിന്യാലിസോറില് നിന്ന് 150 കിലോമീറ്റര് അകലെയാണ് ഋഷികേശ് എയിംസ്. എത്രയും വേഗം എത്തിക്കണമെന്നതിനാലാണ് ഹെലികോപ്റ്റര് ഉപയോഗിച്ചത്. നേരത്തെ തന്നെ ഹെലികോപ്റ്റര് സജ്ജമാക്കി നിര്ത്തിയിരുന്നു.
രക്ഷപ്പെടുത്തിയ 41 തൊഴിലാളികളെയും എയിംസിലേക്ക് മാറ്റുന്നതിന് മുമ്പ് ചിന്യാലിസോറിലെ ആശുപത്രിയിലെത്തി ഉത്തരാഖണ്ഡ് മുഖ്യമന്ത്രി പുഷ്കര് സിങ് ധാമി സന്ദര്ശിച്ചു. ഓരോരുത്തര്ക്കും ഒരു ലക്ഷം രൂപയുടെ ചെക്ക് അദ്ദേഹം കൈമാറി. തുരങ്കത്തിനുള്ളില് കുടുങ്ങിയ തൊഴിലാളികളെ പുറത്തെത്തിക്കാന് സഹായിച്ച രക്ഷാപ്രവര്ത്തകര്ക്ക് 50,000 രൂപ പാരിതോഷികവും മുഖ്യമന്ത്രി പ്രഖ്യാപിച്ചു.
ചൊവ്വാഴ്ച രാത്രി എട്ടോടെയാണ് ആദ്യത്തെ തൊഴിലാളിയെ തുരങ്കത്തിന് പുറത്തെത്തിച്ചത്. തുടര്ന്ന് ഓരോരുത്തരെയായി ആംബുലന്സില് ആശുപത്രിയിലേക്ക് എത്തിക്കുകയായിരുന്നു. ദേശീയ ദുരന്തനിവാരണ സേനയുടെ 12 പേര് വീതമടങ്ങുന്ന മൂന്നു സംഘങ്ങള് തുരങ്കത്തിനുള്ളില് പ്രവേശിച്ചാണ് തൊഴിലാളികളെ രക്ഷപ്പെടുത്തിയത്. യന്ത്രങ്ങള് ഉപയോഗിച്ചുള്ള തുരക്കല് പ്രതിബന്ധങ്ങളില് തട്ടി നിന്നതോടെ ഉത്തര്പ്രദേശിലെ ഝാന്സിയില് നിന്നുള്ള ആറംഗ റാറ്റ്ഹോള് മൈനേഴ്സ് സംഘം യന്ത്രസഹായമില്ലാതെ തുരന്നാണ് അവസാന രക്ഷാമാര്ഗമൊരുക്കിയത്.
