ബെംഗളൂരു: ഇരുപത് ദിവസം മാത്രം പ്രായമുള്ള ആണ്‍കുഞ്ഞിനെ വില്‍ക്കാന്‍ ശ്രമിച്ചതിന് മൂന്ന് സ്ത്രീകള്‍ ഉള്‍പ്പെടെ നാല് പേര്‍ അറസ്റ്റില്‍. തമിഴ്‌നാട് ഈറോഡ് സ്വദേശിനികളായ ഹേമലത (27), ശരണ്യ (33) മധുരയില്‍ നിന്നുള്ള മുരുഗേശ്വരി (22), കണ്ണന്‍ രാമസാമി (51) എന്നിവരെ ബെംഗളൂരു സിറ്റി ക്രൈംബ്രാഞ്ച്‌ പോലീസ് (സിസിബി) അറസ്റ്റ് ചെയ്തത്.
ആശുപത്രികളില്‍ നിന്നും കുട്ടികളെ തട്ടിക്കൊണ്ടുപോയി കുട്ടികളില്ലാത്ത ദമ്പതികള്‍ക്ക് വില്‍ക്കുന്നതാണ് പ്രതികളുടെ രീതിയെന്ന് പോലീസ് പറഞ്ഞു. ചെന്നൈ പോലീസ് നല്‍കിയ സൂചനകള്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികള്‍ അറസ്റ്റിലായത്. ആര്‍ആര്‍ നഗറിലെ രാജരാജേശ്വരി ക്ഷേത്രത്തിന് സമീപം നഗരത്തില്‍ നിന്നുള്ള ദമ്പതികള്‍ക്ക് കുഞ്ഞിനെ വില്‍ക്കാന്‍ ശ്രമിക്കവേയാണ് പ്രതികള്‍ അറസ്റ്റിലായത്.
ഇവരില്‍ നിന്നും പണവും, ആഭരണവും ഒരു മാരുതി സ്വിഫ്റ്റ് കാറും പിടിച്ചെടുത്തു. പ്രതികള്‍ കുഞ്ഞിനെ എവിടെ നിന്നാണ് കൊണ്ടുവന്നതെന്നും കുഞ്ഞിന്റെ മാതാപിതാക്കളെ സംബന്ധിച്ചുള്ള വിവരങ്ങളും നിലവില്‍ വ്യക്തമല്ല. സംഭവത്തില്‍ വിശദ അന്വേഷണം പുരോഗമിക്കുകയാണ്.
പ്രതികരിക്കാൻ ഇവിടെ എഴുതുക: