കൊച്ചി: കുസാറ്റ് ടെക് ഫെസ്റ്റിനോടനുബന്ധിച്ച് കഴിഞ്ഞ ദിവസം നാലു പേരുടെ മരണത്തിനിടയാക്കിയ ദുരന്തം സംബന്ധിച്ച് സമഗ്രമായ അന്വേഷണം നടത്തണമെന്നു ബിജെപി ആവശ്യപ്പെട്ടു. ഉത്തരവാദിത്തപ്പെട്ടവരുടെ അശ്രദ്ധയോ നിസംഗതയോ കൊണ്ടാണു ദുരന്തം ഉണ്ടായത്. കുറ്റം ചെയ്തവരെ നിയമത്തിനു മുന്നിലെത്തിക്കണം.
ഇത്ര വലിയ പരിപാടി നടത്തുമ്പോള്‍ പോലീസ് അനുമതി തേടിയില്ല എന്ന കാര്യം ഞെട്ടിക്കുന്നതാണ്. ആവശ്യമായ പോലീസിനെ ആവശ്യപ്പെട്ടിട്ടും നല്‍കിയില്ലെന്ന സര്‍വകലാശാല അധികൃതരുടെ വെളിപ്പെടുത്തലും അമ്പരപ്പിക്കുന്നതാണെന്ന് ബിജെപി ജില്ലാ പ്രസിഡന്റ് കെ.എസ്. ഷൈജു പറഞ്ഞു. വലിയ ആള്‍ക്കൂട്ടം വരുന്ന സ്ഥലങ്ങളില്‍ പോലീസ് കാണിക്കുന്ന നിസംഗത അപലപനീയമാണ്. ഇനി ഇത്തരം ദുരന്തം ഉണ്ടാകാത്തവിധം സമഗ്ര അന്വേഷണം നടത്തി സത്യം പുറത്തു കൊണ്ടുവരണമെന്നു ബിജെപി ആവശ്യപ്പെട്ടു.
ബിജെപി സംഘം പരിക്കേറ്റവരെ സന്ദര്‍ശിച്ചു
കളമശേരി: കുസാറ്റ് ദുരന്തത്തില്‍ പരിക്കേറ്റ് കളമശേരി മെഡിക്കല്‍ കോളജില്‍ ചികിത്സയില്‍ കഴിയുന്നവരെ കേന്ദ്രമന്ത്രി വി. മുരളീധരന്‍, ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ എന്നിവര്‍ സന്ദര്‍ശിച്ചു. ബിജെപി ജില്ലാ പ്രസിഡന്റ് കെ. എസ.് ഷൈജു, ജില്ലാ ജന. സെക്രട്ടറിമാരായ എസ്. സജി, വി.കെ. ഭസിത്കുമാര്‍ എന്നിവര്‍ ഒപ്പമുണ്ടായിരുന്നു.
പ്രതികരിക്കാൻ ഇവിടെ എഴുതുക: