തിരുവന്തപുരം : സാധനങ്ങള് എത്തിക്കാനുളള കരാര് സ്വീകരിക്കാന് ആളില്ലാതെ സപ്ലൈകോ കടുത്ത പ്രതിസന്ധിയിലേക്ക്. ടെണ്ടറില് പങ്കെടുക്കുന്ന വ്യാപാരികളുടെ എണ്ണം കുത്തനെയാണ് കുറഞ്ഞത്. പങ്കെടുത്തവര് ഉയര്ന്ന തുക ക്വാട്ട് ചെയ്തതിനാല് ടെണ്ടര് സപ്ലൈകോ നിരസിക്കുകയും ചെയ്തു.
കുടിശ്ശിക തീര്ത്തു നല്കാതെ ടെണ്ടറില് പങ്കെടുക്കില്ലെന്ന നിലപാടിലാണ് ഭൂരിഭാഗം വ്യാപാരികളും. തുക ലഭിക്കുന്നതിലെ അനിശ്ചിതത്വമാണ് ഉയര്ന്ന തുക ക്വാട്ട് ചെയ്തതിന് പിന്നിലെന്നാണ് സൂചന.
സപ്ലൈകോ വ്യാപാരികള്ക്ക് നല്കാനുള്ളത് 700 കോടിയിലധികം രൂപയാണ്. ഈ തുക ഓണത്തിന് ശേഷം നല്കുമെന്ന് സപ്ലൈകോ അറിയിച്ചെങ്കിലും സാമ്പത്തിക പ്രതിസന്ധി മൂലം ധനവകുപ്പ് തുക അനുവദിക്കാതായതോടെ കരാറുകാര് കൂട്ടത്തോടെ പിന്വാങ്ങി.
ഇപ്പോള് ക്വാട്ട് ചെയ്ത ഉയര്ന്ന നിരക്കില് സാധനങ്ങള് വാങ്ങാനാകില്ലെന്ന് സപ്ലൈകോ വ്യക്തമാക്കി. തുടര്ന്ന് ഈ ടെണ്ടറുകള് സപ്ലൈകോ നിരസിച്ചു.
പരിപ്പ്, അരി, പഞ്ചസാര, ഏലം എന്നിവയ്ക്ക് ഈ മാസം14ന് ടെന്ഡര് ക്ഷണിച്ചെങ്കിലും പ്രതികരണം പ്രതീക്ഷിച്ച തോതിലായില്ല. ഇതേതുടര്ന്ന് വീണ്ടും ടെണ്ടര് ക്ഷണിക്കാനാണ് നീക്കം. വ്യാപാരികള് സഹകരിച്ചില്ലെങ്കില് സപ്ലൈകോ ഔട്ട്ലെറ്റുകള് അടച്ചിടേണ്ട സ്ഥിതിയി വരും.
