മാഞ്ചസ്റ്റര്: പ്രീമിയര് ലീഗ് ഫുട്ബോളില് ഇന്നലെ നടന്ന തുല്യശക്തികളായ മാഞ്ചസ്റ്റര് സിറ്റിയും ലിവര്പൂളും ഏറ്റുമുട്ടിയ മത്സരം സമനിലയില് കലാശിച്ചു. ഇരുടീമുകളും രണ്ട് പാതികളിലുമായി ഓരോ ഗോള് നേടി പിരിഞ്ഞു. എര്ലിങ് ഹാളണ്ടിലൂടെ സിറ്റി ആദ്യ പകുതിയില് നേടിയ ആധിപത്യത്തിന് രണ്ടാം പകുതിയില് ട്രെന്റ് അലക്സാണ്ടര് അര്ണോള്ഡിലൂടെ ലിവര് മറുപടി നല്കി.
സ്വന്തം തട്ടകത്തില് നടന്ന കളിയുടെ 27-ാം മിനിറ്റിലാണ് സിറ്റിയുടെ സൂപ്പര് സ്ട്രൈക്കര് ഹാളണ്ട് ലിവര് വലയ്ക്കകത്ത് നിറയൊഴിച്ചത്. ആദ്യ പകുതിയില് ഏക ഗോളിന്റെ ആധിപത്യത്തില് മുന്നിട്ടുനിന്ന സിറ്റിക്കെതിരെ രണ്ടാം പകുതിയില് ലിവര് 80-ാം മിനിറ്റിലാണ് സമനില ഗോള് നേടിയത്.
