കൊച്ചി: കിഫ്ബി മസാല ബോണ്ടുകളിറക്കിയതില്‍ നിയമ ലംഘനമുണ്ടോയെന്ന അന്വേഷണത്തിന്റെ ഭാഗമായി മുന്‍മന്ത്രി തോമസ് ഐസക്, കിഫ്ബി സിഇഒ കെ.എം. എബ്രഹാം, ജോ. ഫണ്ട് മാനേജര്‍ ആനി ജൂല തോമസ് തുടങ്ങിയവര്‍ക്ക് പുതിയ സമന്‍സ് അയയ്‌ക്കാന്‍ എന്‍ഫോഴ്സ്മെന്റ് ഡയറക്ടറേറ്റിന് (ഇഡി) ഹൈക്കോടതി അനുമതി നല്കി. തോമസ് ഐസക് ഉള്‍പ്പെടെയുള്ളവര്‍ക്ക് പുതിയ സമന്‍സ് അയയ്‌ക്കാമെന്നും അന്വേഷണം തുടരാമെന്നും വ്യക്തമാക്കിയ സിംഗിള്‍ ബെഞ്ച് ഇവ ഹൈക്കോടതിയുടെ തുടര്‍ ഉത്തരവുകള്‍ക്കു വിധേയമായിരിക്കുമെന്നും പറഞ്ഞിട്ടുണ്ട്. മസാല ബോണ്ടുവഴി വിദേശത്തു നിന്ന് കിഫ്ബി പണം സമാഹരിച്ചതിലും വിനിയോഗിച്ചതിലും വിദേശ നാണ്യ വിനിമയ നിയമത്തിന്റെ (ഫെമ) ലംഘനമുണ്ടോയെന്നാണ് ഇ ഡി അന്വേഷിക്കുന്നത്.
ഇ ഡി തുടര്‍ച്ചയായി സമന്‍സ് നല്കി ബുദ്ധിമുട്ടിക്കുന്നെന്നാരോപിച്ച് തോമസ് ഐസക്കും കിഫ്ബി അധികൃതരും നല്കിയ ഹര്‍ജിയില്‍ ഇവര്‍ക്ക് സമന്‍സ് നല്കുന്നത് ഹൈക്കോടതി നേരത്തേ തടഞ്ഞിരുന്നു. ഈ ഉത്തരവില്‍ ഭേദഗതി വരുത്തിയാണ് പുതിയ സമന്‍സ് തയ്യാറാക്കി അയയ്‌ക്കാന്‍ ജസ്റ്റിസ് ദേവന്‍ രാമചന്ദ്രന്‍ അനുമതി നല്കിയത്. തങ്ങള്‍ ചെയ്ത കുറ്റമെന്താണെന്നോ ഫെമ നിയമത്തില്‍ എന്തു ലംഘനമാണുണ്ടായതെന്നോ വിശദീകരിക്കാതെയാണ് സമന്‍സ് നല്കുന്നതെന്ന് ഹര്‍ജിക്കാര്‍ ആരോപിച്ചിരുന്നു. വ്യക്തിപരമായ വിവരങ്ങള്‍ ഹാജരാക്കാന്‍ ആവശ്യപ്പെട്ട് തനിക്കു സമന്‍സ് നല്കിയതു നിയമപരമല്ലെന്നു തോമസ് ഐസക്കും ചൂണ്ടിക്കാട്ടിയിരുന്നു. തുടര്‍ന്നാണ് സമന്‍സ് അയയ്‌ക്കുന്നത് ഹൈക്കോടതി തടഞ്ഞത്.
സമന്‍സ് തടഞ്ഞതോടെ അന്വേഷണം നിലച്ചെന്നും പുതിയ സമന്‍സ് നല്കാന്‍ അനുവദിക്കണമെന്നും ഇഡിക്കു വേണ്ടി ഹാജരായ അഡി. സോളിസിറ്റര്‍ ജനറല്‍ എ.ആര്‍.എല്‍. സുന്ദരേശന്‍ ആവശ്യപ്പെട്ടു. പുതിയ സമന്‍സുകള്‍ കോടതിയുടെ തുടര്‍ പരിശോധനയ്‌ക്കു വിധേയമായിരിക്കും.
പ്രതികരിക്കാൻ ഇവിടെ എഴുതുക: