കൊച്ചി : കളമശ്ശേരിയിലെ കുസാറ്റ് ക്യാമ്പസില് സ്കൂള് ഓഫ് എഞ്ചിനിയറിങ് വിദ്യാര്ത്ഥികള് സംഘടിപ്പിച്ച ടെക്ഫെസ്റ്റിനിടെയുണ്ടായ അപകടത്തില് ഉന്നത വിദ്യാഭ്യാസ വകുപ്പ് അന്വേഷണം പ്രഖ്യാപിച്ചു. ഉന്നത വിദ്യാഭ്യാസ മന്ത്രി ആര്. ബിന്ദു ഉന്നത വിദ്യാഭ്യാസ വകുപ്പ് പ്രിന്സിപ്പല് സെക്രട്ടറിയോടും കുസാറ്റ് വിസിയോടും വിശദീകരണം തേടി. സംഭവത്തില് കളമശ്ശേരി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
ശനിയാഴ്ച വൈകിട്ടാണ് ടെക്ഫെസ്റ്റിന്റെ ഭാഗമായിട്ടുണ്ടായിരുന്ന സംഗീത നിശക്ക് തൊട്ടുമുമ്പുണ്ടായ തിക്കിലും തിരക്കിലും പെട്ട് മൂന്ന് വിദ്യാര്ത്ഥികളടക്കം നാല് പേര് മരിച്ചത്. അപകടത്തില് 51 പേര്ക്ക് പരിക്കേറ്റു. ഇവരില് ഒരാളുടെ നില അതീവ ഗുരുതരമാണ്. കാമ്പസിനകത്തുള്ള ആംഫി തീയ്യേറ്ററില് സംഘടിപ്പിച്ച സംഗീത നിശയില് പങ്കെടുക്കാനെത്തിയവരാണ് അപടകത്തില് പെട്ടത്. വൈകിട്ട് ഏഴേകാലോടെയായിരുന്നു സംഭവം. മഴവന്നപ്പോള് റോഡരികില് നിന്നവര് ആംഫി തിയേറ്ററിലേക്ക് തള്ളിക്കയറാന് ശ്രമിച്ചതാണ് അപകടകാരണം. തീയറ്ററിലേക്ക് കയറാനും ഇറങ്ങാനും ഒരു ഗേറ്റ് മാത്രമാണുള്ളത്. ഗേറ്റ് കഴിഞ്ഞുള്ള പടിക്കെട്ടില് നിന്നവര് തിക്കിലും തിരക്കിലും താഴോട്ട് വീഴുകയായിരുന്നു, അവരുടെ മുകളിലേക്ക് കൂടുതല് ആളുകകള് വീണു. ചവിട്ടേറ്റും ശ്വാസം മുട്ടിയുമാണ് വിദ്യാര്ത്ഥികള് മരിച്ചത്.രണ്ടാം വര്ഷ സിവില് എഞ്ചിനിയറിംഗ് വിദ്യാര്ത്ഥികളായ കൂത്താട്ടുകുളം സ്വദേശി അതുല് തമ്പി, നോര്ത്ത് പറവൂര് സ്വദേശിനി ആന് റൂഫ് , താമരശ്ശേരി സ്വദേശിനി സാറ തോമസ്, കുസാറ്റിലെ വിദ്യാര്ത്ഥിയല്ലാത്ത പാലക്കാട് മുണ്ടൂര് സ്വദേശി ആല്ബിന് ജോസഫ് എന്നിവരാണ് മരിച്ചത്.
മരിച്ചവരുടെ മൃതദേഹങ്ങള് കളമശ്ശേരി മെഡിക്കല് കോളേജ് മോര്ച്ചറിയിലാണ്. 4 വിദ്യാര്ത്ഥികള്ക്ക് ഗുരുതരമായ പരിക്കുണ്ട്. ഇവരില് 2 പേരെ സ്വകാര്യ ആശുപത്രിയിലേക്ക് മാറ്റിയിരുന്നു. ഇവരില് ഒരാളുടെ നില അതീവ ഗുരുതരമാണ്. ചെറിയ പരിക്കേറ്റ 32 വിദ്യാര്ത്ഥികള് മെഡിക്കല് കോളേജില് ചികിത്സയിലുണ്ട്. 15 പേര് കിന്ഡര് ആശുപത്രിയിലുണ്ട്. പ്രതിപക്ഷ നേതാവടക്കമുള്ളവര് സ്ഥലത്തെത്തി.കുസാറ്റില് എല്ലാ വര്ഷവും നടക്കാറുള്ള ടെക് ഫെസ്റ്റിന്റെ ഭാഗമായുള്ള കലാപരിപാടികളില് പങ്കെടുക്കാന് കാമ്പസിനു പുറത്തു നിന്നും ധാരാളം ആളുകള് എത്താറുണ്ട്.
ബോളിവുഡ് ഗായിക പങ്കെടുക്കുന്ന പരിപാടിക്ക് വലിയ ജനക്കൂട്ടമുണ്ടാകുമെന്ന് മുന് കൂട്ടി കണ്ട് ക്രമീകരണങ്ങള് ശക്തിപ്പെടുത്തുന്നതില് വീഴ്ച വന്നുവെന്നാണ് പ്രാഥമിക നിഗമനം. കാമ്പസിലെ വിദ്യാര്ത്ഥികളുടെ പരിപാടികള്ക്ക് സാധാരണയുള്ള പോലീസ് സാന്നിധ്യം മാത്രമേ ഉണ്ടായിരുന്നുള്ളു. അസ്വാഭാവിക മരണത്തിന് കേസ് എടുത്ത് കളമശ്ശേരി പോലീസ് അന്വേഷണം തുടങ്ങി.
പുലര്ച്ചെ മണിയോടെ കളമശ്ശേരി മെഡിക്കല് കോളേജ് ആശുപത്രിയിലെത്തിയ മന്ത്രിമാരായ പി.രാജീവും ആര്.ബിന്ദുവും പരിക്കേറ്റവരെ കണ്ടു. അപ്രതീക്ഷിത സംഭവമാണെന്നും പരിക്കേറ്റ എല്ലാവര്ക്കും ചികിത്സ ഉറപ്പാക്കിയിട്ടുണ്ടെന്നും പി.രാജീവ് പറഞ്ഞു. കുസാറ്റ് ദുരന്തത്തില് വൈസ് ചാന്സലറോടും ഉന്നത വിദ്യാഭ്യാസ പ്രിന്സിപ്പല് സെക്രട്ടറിയോടും റിപ്പോര്ട്ട് തേടിയതായി ഉന്നത വിദ്യാഭ്യാസ മന്ത്രി ആര്.ബിന്ദു പറഞ്ഞു. പരിക്കേറ്റവരുടെ ചികിത്സാചെലവ് സര്വകലാശാല വഹിക്കുമെന്നും മന്ത്രി അറിയിച്ചു.
അതേസമയം കുസാറ്റ് ദുരന്തത്തിന് കാരണം മഴയെ തുടര്ന്നുണ്ടായ തള്ളിക്കയറ്റമാണെന്ന വാദം വിദ്യാര്ത്ഥികള് തള്ളി. പരിപാടിക്കായി ഉള്ളിലേക്ക് കയറാനുള്ള ഗേറ്റ് തുറക്കാന് വൈകിയതാണ് അപകടത്തിലേക്ക് നയിച്ചത്. ഗേറ്റ് തുറന്നപ്പോള് എല്ലാവരും കൂടി തള്ളിക്കയറിയത് അപകടമുണ്ടാക്കി. സെലിബ്രിറ്റി വന്നതുകൊണ്ട് നല്ല തിരക്കുണ്ടായിരുന്നുവെന്ന് ദൃക്സാക്ഷിയായ വിദ്യാര്ത്ഥികള് പറഞ്ഞു. അത്ര വലിയ മഴയുണ്ടായിരുന്നില്ല. ആളുകളെ ഉള്ളില് കയറ്റാന് വൈകിയിരുന്നു. ഗേറ്റ് തള്ളിത്തുറക്കാന് ശ്രമമുണ്ടായി. തുടര്ന്ന് ഗേറ്റ് തുറന്നപ്പോള് ഉന്തും തള്ളുമുണ്ടായി. അടിയിലോട്ട് സ്ലോപ്പായിട്ടുള്ള സ്റ്റെപ്പാണ്. തള്ളല് വന്നപ്പോള് കുറേപ്പേര് വീണുപോയി. താന് സൈഡിലൂടെ എങ്ങനെയോ രക്ഷപ്പെട്ടതാണെന്ന് ഒരു വിദ്യാര്ത്ഥി പറഞ്ഞു.
