ചേര്‍ത്തല: കേന്ദ്രത്തില്‍ നരേന്ദ്ര മോദി സര്‍ക്കാര്‍ വീണ്ടും അധികാരത്തിലെത്തുമെന്ന് എസ്എന്‍ ട്രസ്റ്റ് സെക്രട്ടറി വെള്ളാപ്പള്ളി നടേശന്‍. ട്രസ്റ്റ് സെക്രട്ടറിയായി ഒന്‍പതാം തവണയും തെരഞ്ഞെടുക്കപ്പെട്ട ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. സിപിഎമ്മിന്റെ മുസ്ലീം ലീഗ് പ്രണയം നല്ലതിനല്ല.
എല്‍ഡിഎഫിനെ അധികാരത്തിലെത്താന്‍ സഹായിച്ചവരെ മറന്ന് സിപിഎം മുസ്ലീലീഗിന്റെ പിന്നാലേ പോയത് ശരിയല്ല. ലീഗിന്റെ മറുപടി സര്‍ക്കാരിനും സിപിഎമ്മിനുമേറ്റ കരണത്തടിയാണ്. ലീഗിനെ കൂടെക്കൂട്ടി ന്യൂനപക്ഷ പ്രീണനം നടത്താനുള്ള നീക്കം പാര്‍ട്ടിയിലെ സാധാരണ പ്രവര്‍ത്തകര്‍ക്കിഷ്ടമാകുന്നില്ല. പൊതുജനം കഴുതയാണെന്ന് കരുതരുതെന്നും അദ്ദേഹം പറഞ്ഞു.
എല്‍ഡിഎഫ് പിന്നാലെ നടന്നതിന്റെ പേരില്‍ ബുദ്ധിയുള്ള ലീഗ് യുഡിഎഫില്‍ അധികസീറ്റിനായി പിടിമുറുക്കിയിരിക്കയാണ്. അരിയാഹാരം കഴിക്കുന്നവര്‍ക്ക് ഇതു മനസിലാകും.
സാമൂഹ്യ പെന്‍ഷന്‍ മുടക്കിയത് ശരിയായ നടപടിയല്ലെന്നും താളംതെറ്റിയ പെന്‍ഷന്‍ വിതരണം കൂടുതല്‍ കാര്യക്ഷമമാക്കണമെന്നും അദ്ദേഹംം ആവശ്യപ്പെട്ടു. പ്രതിപക്ഷ നേതാവിന്റെ ഭാഷ പടയണിക്കിടെ പറയുന്ന ഭാഷയാണെന്നും മാടമ്പി സംസ്‌കാരമാണെന്നും അദ്ദേഹം പറഞ്ഞു. ഗ്രൂപ്പും ഗ്രൂപ്പിനുള്ളില്‍ ഗ്രൂപ്പുകളുമായി കോണ്‍ഗ്രസ് സര്‍വനാശത്തിലേക്കാണ് പോകുന്നത്.
നവകേരളസദസിന്റെ ലക്ഷ്യം ലോക്‌സഭാ തെരഞ്ഞെടുപ്പിനുള്ള പ്രചാരണം കൂടിയാണ്. ഇതിനെതിരെ പ്രതിഷേധിച്ചവരെ ചെടിച്ചട്ടിക്കടിച്ചത് അക്രമമാണ്. പ്രതിഷേധിക്കാന്‍ എല്ലാവര്‍ക്കും അവകാശമുണ്ടെന്നും പ്രതിഷേധങ്ങളെ സമാധാനപരമായി നേരിടാതെ അതിന്റെ പേരില്‍ നുണപറയുന്നത് ശരിയല്ലെന്നും വെള്ളാപ്പള്ളി പറഞ്ഞു.
ട്രസ്റ്റിന്റെ പുരോഗതിയെ എതിര്‍ക്കുന്നവരാണ് 27 വര്‍ഷമായി തന്നെ വേട്ടയാടുന്നതെന്നും സാമ്പത്തികമായി ട്രസ്റ്റിനെ തകര്‍ക്കാനാണ് ഇവരുടെ ശ്രമമെന്നും നിഴല്‍യുദ്ധം അവസാനിപ്പിച്ച് മുഖ്യധാരയിലെത്തുന്നവരെ കൂടെനിര്‍ത്തി സംഘടനയെ വളര്‍ത്തുകയാണ് ലക്ഷ്യമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: