തിരുവനന്തപുരം: മുംബൈ വിമാനത്താവളം ബോംബ് ഉപയോഗിച്ച് തകർക്കുമെന്ന് ഭീഷണിപ്പെടുത്തിയ സംഭവത്തിൽ കേരളത്തിൽ നിന്ന് ഒരാളെ കൂടി എ.ടി.എസ് കസ്റ്റഡിയിലെടുത്തു. കിളിമാനൂർ ചൂട്ടയിൽ സ്വദേശി ഫെബിൻ ഷായാണ് (23) കസ്റ്റഡിയിലെടുത്തത്. ഷെയർ മാർക്കറ്റിൽ ഓൺലൈൻ വ്യാപാരം ചെയ്യുന്നയാളാണ് ഫെബിൻ ഷാ.
23-കാരനായ ഫെബിൻ ഷാ അമ്മയുടെ ബ്രോഡ് ബാന്റ് കണക്ഷൻ ഉപയോഗിച്ചാണ് ഇ-മെയിൽ വഴി ഭീഷണി സന്ദേശം അയച്ചത്. കോടിക്കണക്കിന് രൂപ ബിറ്റ്കോയിൻ രൂപത്തിൽ നൽകണമെന്നായിരുന്നു സന്ദേശത്തിലുണ്ടായിരുന്നത്. ഇത് അംഗീകരിച്ചില്ലെങ്കിൽ വിമാനത്താവളം ബോംബ് വച്ച് തകർക്കുമെന്നും ഭീഷണി സന്ദേശത്തിൽ ഫെബിൻ പറഞ്ഞിരുന്നു.
ഇയാളെ കിളിമാനൂർ പോലീസ് സ്റ്റേഷനിൽ നിന്നും ആറ്റിങ്ങൽ കോടതിയിലേക്ക് കൊണ്ടുപോയി. കോടതിയിൽ ഹാജരാക്കിയ ശേഷം ഇയാളെ മുംബൈയിലേക്ക് കൊണ്ടുപോകുമെന്ന് അറിയുന്നു. സംഭവത്തിൽ ഇന്നലെ അമീൻ എന്നയാളെ തിരുവനന്തപുരത്തു നിന്ന് എ.ടി.എസ് കസ്റ്റഡിയിൽ എടുത്തിരുന്നു.
ഇക്കഴിഞ്ഞ 23 നു രാവിലെ ഇ-മെയിൽ വഴിയിയായിരുന്നു ഭീഷണി സന്ദേശം ലഭിച്ചത്.
