ദേവ്ഗഡ്: അഞ്ചു വര്‍ഷത്തെ ഭരണത്തിലൂടെ രാജസ്ഥാനെ കോണ്‍ഗ്രസ് സ്ത്രീപീഡനങ്ങളുടേയും അക്രമങ്ങളുടേയും നാടാക്കി മാറ്റിയെന്ന് പ്രധാനമന്ത്രി നരേന്ദ്ര മോദി. രാജ്യത്തെ മികച്ച സംസ്ഥാനങ്ങളിലൊന്നാക്കി മാറ്റാന്‍ ബിജെപി ഭരണ കാലത്ത് നല്ല പരിശ്രമം നടത്തിയിരുന്നു. എന്നാല്‍ കഴിഞ്ഞ അഞ്ചു വര്‍ഷത്തില്‍ കോണ്‍ഗ്രസ് സര്‍ക്കാര്‍ അതെല്ലാം നശിപ്പിച്ചു. ഇത്രയും കൂടുതല്‍ സ്ത്രീ പീഡനങ്ങള്‍ മറ്റേതെങ്കിലും സര്‍ക്കാരിന്റെ കാലത്ത് രാജസ്ഥാന്‍ സംഭവിച്ചു എന്നു തോന്നുന്നില്ല, ദേവ്ഗഡില്‍ തെരഞ്ഞെടുപ്പു പ്രചരണ യോഗത്തില്‍ സംസാരിക്കവെ പ്രധാനമന്ത്രി പറഞ്ഞു.
എന്നെ വ്യക്തിപരമായി അപമാനിക്കുക എന്നത് കോണ്‍ഗ്രസ് നേതാക്കള്‍ പതിവാക്കിയിരിക്കുന്നു. എന്റെ പാര്‍ട്ടിയുടെ ശക്തി എന്താണെന്ന് അറിയാതെയാണ് ആവര്‍ അതു ചെയ്യുന്നത്. ഈ യോഗത്തില്‍ത്തന്നെ നോക്കൂ. ബിജെപിയുടെ പതാകയേന്തി എത്രമാത്രം അമ്മമാരും സഹോദരിമാരും പെണ്‍മക്കളുമാണ് എത്തിയിരിക്കുന്നത്. അവരാണ് എന്റെ ശക്തി, അവരാണ് ഈ പാര്‍ട്ടിയുടെ ശക്തി, പ്രധാനമന്ത്രി പറഞ്ഞു.
കോണ്‍ഗ്രസിന്റെ നിലപാടുകളെ ഈ സംസ്ഥാനത്തെ സ്ത്രീകള്‍ ഒരു നിമിഷത്തേക്കു പോലും അംഗീകരിക്കില്ലെന്ന് നിരവധി പ്രചാരണയോഗങ്ങളില്‍ നിന്ന് എനിക്കു മനസിലായി. ഇതു തുറന്നു പറയുമ്പോള്‍ കോണ്‍ഗ്രസ് നേതാക്കള്‍ എന്നെ അധിക്ഷേപിക്കുന്നു. അതുകൊണ്ട് ആഗ്രഹിക്കുന്ന കാര്യങ്ങള്‍ നേടാമെന്നാണ് അവരുടെ ധാരണ. എന്നാല്‍ ഒരാളെ അധിക്ഷേപിക്കുന്നതു കൊണ്ട്, ലക്ഷക്കണക്കിനു പ്രവര്‍ത്തകര്‍ രക്തവും വിയര്‍പ്പും വീഴ്ത്തി വളര്‍ത്തിയ പ്രസ്ഥാനത്തെ തകര്‍ക്കാന്‍ കഴിയില്ല എന്നവര്‍ മനസിലാക്കുന്നില്ല, പ്രധാനമന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: