കോഴിക്കോട് : യുഡിഎഫ് ഭരിക്കുന്ന തദ്ദേശ സ്വയംഭരണ സ്ഥാപനങ്ങളെ മൂക്കു കയറിട്ട് നിര്‍ത്തിയിരിക്കുകയാണെന്ന് മുഖ്യമന്ത്രി പിണറായി വിജയന്‍. നവകേരള സദസ്സിന്റെ നടത്തിപ്പിനായി പറവൂര്‍ നഗരസഭ ഒരു ലക്ഷം നല്‍കാന്‍ തീരുമാനിച്ചെങ്കിലും പിന്നീട് അതില്‍ നിന്നും പിന്മാറി. ഇതുമായി ബന്ധപ്പെട്ട് സംസാരിക്കുകയായിരുന്നു അദ്ദേഹം.
യുഡിഎഫ് ഭരിക്കുന്നതും പ്രതിപക്ഷ നേതാവ് വി.ഡി. സതീശന്റെ മണ്ഡലവുമാണ് പറവൂര്‍. ഇവിടെ നിന്നും നവകേരള സദസ്സിനായി പണം നല്‍കുമെന്ന് അറിയിച്ചത് ഏറെ വിവാദമായിരുന്നു. കോണ്‍ഗ്രസ് ഇതിനെതിരെ രംഗത്ത് എത്തുകയും ചെയ്തതോടെ ചെയര്‍പേഴ്‌സണ്‍ പണം നല്‍കില്ലെന്ന് അറിയിക്കുകയും കൗണ്‍സിലര്‍മാരുടെ യോഗം വിളിച്ചു ചേര്‍ത്ത് തീരുമാനം എടുക്കുകയുമായിരുന്നു.
എന്നാല്‍ തദ്ദേശ സ്ഥാപനങ്ങളെ കോണ്‍ഗ്രസ് മൂക്കു കയറിട്ട് ബന്ധിച്ച് നിര്‍ത്തിയിരിക്കുകയാണ്. അവരെ സ്വതന്ത്രമായി പ്രവര്‍ത്തിക്കാന്‍ അനുവദിക്കം. ജനാധിപത്യപരമായി പ്രവര്‍ത്തനങ്ങള്‍ക്കായി നവകേരള സദസ്സിന്റെ പ്രവര്‍ത്തനങ്ങള്‍ക്ക് ഒരു ലക്ഷം രൂപ നല്‍കുമെന്ന ഏകകണ്ഠമായി തദ്ദേശ സ്വയംഭരണ സ്ഥാപനങ്ങള്‍ തീരുമാനം കൈക്കൊണ്ടതാണ്.
പണം നല്‍കിയാല്‍ അംഗങ്ങളുടെ സ്ഥാനം തെറിപ്പിക്കുമെന്ന ഭീഷണി ഉയര്‍ത്തുന്നത് ഒരുതരത്തിലും നാടിന് അംഗീകരിക്കാന്‍ ആവില്ല. പറവൂരില്‍നിന്നുള്ള എംഎല്‍എ കൂടിയായ പ്രതിപക്ഷ നേതാവിന്റെ അപക്വമായ നടപടി സാധാരണ രീതിയില്‍ ഉണ്ടാകാന്‍ പാടില്ലാത്തതായിരുന്നു. നവകേരള സദസ്സിലേക്ക് ജനങ്ങള്‍ പ്രവഹിക്കുന്നത് എന്തെങ്കിലും നിര്‍ബന്ധത്തിന്റെ ഫലമായിട്ടല്ല.
ചിലര്‍ താന്‍ ശൈലജ ടീച്ചര്‍ക്കെതിരെ എന്തോ പറഞ്ഞെന്ന് പറഞ്ഞുപരത്തുന്നു. ആ കളി വേണ്ടെന്നും മുഖ്യമന്ത്രി പറഞ്ഞു. മട്ടന്നൂര്‍ മണ്ഡലത്തിലെ നവകേരളസദസ്സില്‍ സ്ഥലം എംഎല്‍എയായ കെ.കെ. ശൈലജ പ്രസംഗം നീട്ടിക്കൊണ്ട് പോയതിനാല്‍ താന്‍ കൂടുതല്‍ സംസാരിക്കുന്നില്ലെന്ന് മുഖ്യമന്ത്രി പറഞ്ഞത് വിവാദമായിരുന്നു. താന്‍ പ്രസംഗം നീട്ടിയിട്ടില്ല. 15 മിനിറ്റ് മാത്രമാണ് പ്രസംഗിച്ചത്. തന്റെ പ്രസംഗം കാരണം പരിപാടി വൈകിയിട്ടില്ല എന്ന് ഇന്ന് കെകെ ശൈലജ വിശദീകരിച്ചിരുന്നു. ഇതിന് പിന്നാലെയാണ് മുഖ്യമന്ത്രി മാധ്യമങ്ങള്‍ക്ക് മേല്‍ പഴിചാരുകയായിരുന്നു.
പ്രതികരിക്കാൻ ഇവിടെ എഴുതുക: