ശബരിമല: കേന്ദ്ര കാലാവസ്ഥ വകുപ്പ് പത്തനംതിട്ട ജില്ലയില് റെഡ് അലേര്ട്ട് മുന്നറിയിപ്പ് നല്കിയതിന്റെ അടിസ്ഥാനത്തില് പമ്പയിലും സന്നിധാനത്തുമുള്ള മുഴുവന് അടിയന്തരസേന അംഗങ്ങളും തയ്യാറെടുപ്പുകള് നടത്തി സുസജ്ജം. അഗ്നിശമന സേന അംഗങ്ങളെ സന്നിധാനത്തുള്ള പത്ത് പോയിന്റുകളില് എല്ലാ വിധ സജ്ജീകരണങ്ങളോടും കൂടി വിന്യസിച്ചിട്ടുണ്ട്. സദാ ജാഗ്രത പുലര്ത്തുവാനും അടിയന്തര സാഹചര്യം മുന്നില് കണ്ട് പ്രവര്ത്തിക്കുവാനും നിര്ദ്ദേശം നല്കിയിട്ടുണ്ട്.
പമ്പയില് നിലവില് ജല നിരപ്പ് സാധാരണ ഗതിയില് ആണെങ്കില് പോലും റെഡ് അലേര്ട്ട് കണക്കിലെടുത്തു ഭക്തന്മാര് പമ്പയില് ഇറങ്ങി കുളിക്കുന്നത് സേനാംഗങ്ങള് നിയന്ത്രിക്കുന്നുണ്ട്. പോലീസ് സേനയുടെ ഡ്യൂട്ടിയില് ഉള്ള മുഴുവന് അംഗങ്ങളും പമ്പയിലും സന്നിധാനത്തുമായി വിന്യസിക്കപ്പെട്ടിട്ടുണ്ട്. ശരംകുത്തി, മരക്കൂട്ടം സന്നിധാനം എന്നിവിടങ്ങളില് ജാഗ്രതനിര്ദ്ദേശങ്ങളും അറിയിപ്പുകളും അയ്യപ്പന്മാര്ക്കായി സേന നല്കുന്നുണ്ട്. ദുരന്ത നിവാരണ ഉപകരണങ്ങളോട് കൂടി ദേശീയ ദുരന്ത നിവാരണ സേനയുടെ ഒരു ടീം സന്നിധാനത്തും ഒരു ടീം പമ്പയിലും ഇതിനോടകം തന്നെ പ്രവര്ത്തിക്കുന്നുണ്ട്.
അടിയന്തര സാഹചര്യത്തില് ആവശ്യം വന്നാല് ബാക്കപ്പ് ആയി ഒരു ടീം തൃശൂരില് സജ്ജമാണ്. മണ്ണിടിച്ചിലോ, മാസ് കാഷ്യുവാലിറ്റിയോ മുന്നില് കണ്ട് എട്ട് ഡോക്ടര്മാരും 50 സ്റ്റാഫുകളും അടങ്ങുന്ന മെഡിക്കല് സംഘം സന്നിധാനം ആശുപത്രിയില് സജ്ജമാണ്. രണ്ട് ഐസിയു ബെഡുകളും ഒരു സെമി ഐസിയു ബെഡും അടങ്ങുന്ന സൗകര്യങ്ങള് സന്നിധാനം സഹസ് കാര്ഡിയോളജി ക്ലിനിക്കില് ലഭ്യമാണ്. യാതൊരു വിധത്തിലുള്ള വൈദ്യുതി വിച്ഛേദനവും ഉണ്ടാകാതെ ഇരിക്കുവാന് വേണ്ട എല്ലാ ക്രമീകരണങ്ങളും കെഎസ്ഇബി യുടെ ഭാഗത്ത് നിന്ന് നടത്തിയിട്ടുണ്ട്.
പമ്പയും സന്നിധാനവും മുഴുവനായും കേബിള് സംവിധാനത്തില് വൈദ്യുതി വിതരണം നടത്തുന്നതിനാല് അപകട സാധ്യതയും വിച്ഛേദന സാധ്യതയും 99 ശതമാനം കുറവാണു. എല്ലാ വകുപ്പുകളും ഏകോപനത്തോടെ അയ്യപ്പഭക്തന്മാരുടെ സുരക്ഷയ്ക്കായി എല്ലാവിധ സൗകര്യങ്ങളും പമ്പയിലും സന്നിധാനത്തും ഒരിക്കിയിട്ടുണ്ട്. സേന അംഗങ്ങളുടെ നിര്ദേശങ്ങള് അയ്യപ്പന്മാര് പാലിക്കണം എന്ന് സുരക്ഷാ ചുമതല ഉള്ള ഉദ്യോഗസ്ഥര് ആവശ്യപ്പെട്ടു.
